YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

MÜSAHİBƏLƏR

“Səs” qəzeti tarixə mübariz bir qəzet kimi düşüb

Müsahibimiz “SƏS” qəzetinin baş redaktoru Bəhruz Quliyev

“Səs” qəzetinin 24 yaşı tamam olur. Bəs qəzet bu dövrdə hansı uğurlara imza atıb, hansı layihələr həyata keçirib, hansı planları var? “SƏS” qəzetinin baş redaktoru Bəhruz Quliyev qəzetin tarixi missiya yerinə yetirdiyini söyləyir... 

 

 - “Səs” qəzetinin keçdiyi yolu necə xarakterizə etmək olar? 

 - "Səs" qəzeti olduqca mürəkkəb bir tarixi dövrdə həyata vəsiqə alıb. 1990-cı illərin əvvəlləri Azərbaycanın çox təlatümlü dövrü idi. Həmin dövrdə Azərbaycan yenicə müstəqillik əldə etmişdi. Eyni zamanda, qarşıda köhnə sistemin dağılması, milli dövlətçiliyin yaranması kimi çox ciddi bir tarixi vəzifə dururdu. İnsanların yaddaşlarından silinməyib ki, sovet imperiyasının dağılmasının real olduğu bir zamanda, Azərbaycanda bir sıra qüvvələr moskvapərəst siyasətlərini davam etdirirdilər. Azərbaycanın yenə də hər hansı bir mərkəzdən idarə olunması ideyası tərəfdarları kimi çıxış edirdilər. Məhz belə bir çətin dövrdə araya-ərsəyə gələn "SƏS" qəzetinin əsas fərqləndirici xüsusiyyətlərindən biri məhz o oldu ki, 1990-cı illərin fərqli, alternativ fikirlərini öz səhifələrinə gətirməklə, Azərbaycan xalq hərəkatında və milli-azadlıq hərəkatında fikir plüralizmini, söz və düşüncə azadlığını təmin etmiş oldu.

"Səs" qəzeti Azərbaycansevərlərin səsini, azadfikirli, sağlam düşünən ziyalıların səsini xalqa çatdırdı. Ən başlıcası isə "SƏS" qəzeti cəsarətlə, təqib və təzyiqlərdən çəkinmədən, əsl milli mətbuat təəssübkeşliyi ilə nəşr olunmağa başladı. Bunun da nəticəsi idi ki, 1991, 1992, 1993-cü illərdə qəzetə qarşı o dövrkü hakimiyyət dairələri, ayrı-ayrı siyasi qüvvələr tərəfindən dəfələrlə basqılar, təzyiqlər, hücumlar edilirdi. Ona görə ki, "Səs" qəzeti müstəqil yönümlü idi, fikir plüralizmini, söz və düşüncə azadlığını ortaya qoymuşdu, Azərbaycan həqiqətlərini yazırdı, xalqın səsinə, harayına səs verirdi, onun mənafeyini ifadə edirdi. Milli azadlıq mübarizəsinin həqiqi mahiyyətinin ortaya çıxmasında və sağlam bünövrə üzərində müstəqillik ideyalarının insanlarımız arasında geniş yayılmasında qəzetin müstəsna xidmətləri var. "Səs" qəzetinin Azərbaycanın mətbuat tarixində özünəməxsus yeri və əzəmətli xidmətlərindən biri də Ulu Öndərimiz Heydər Əliyev şəxsiyyətinin və ideyalarının Azərbaycan vətəndaşları arasında geniş şəkildə yayılması ilə bilavasitə əlaqədardır. Bunun nəticəsi idi ki, ölkə ziyalıları, sağlam düşüncə sahibləri o illərdə Azərbaycanın dövlət müstəqilliyini məhv olmaqdan, fəlakət və tənəzzüldən xilas etmək üçün 1992-ci ilin oktyabr ayında "Səs" qəzeti vasitəsilə xalqımızın yeganə ümid yeri olan Ümummilli Liderimiz Heydər Əliyevə müraciət etdilər. Fərəhləndirici  haldır ki,  Ümummilli Liderimiz Heydər Əliyevin ziyalılara ünvanladığı cavab da, məhz  "Səs" qəzetində dərc olundu.

"Səs" qəzeti tarixə mübariz bir qəzet kimi daxil olub, Azərbaycanın müstəqillik tarixində öz layiqli yeri, obyektiv mövqeyi ilə həmişə öndə gedən müstəqil mətbu orqan kimi yaddaşlara həkk olunub.

Bu gün böyük iftixar və fəxr hissi ilə qeyd etmək istərdim ki, Ulu Öndərimiz Heydər Əliyev siyasi kursunun layiqli davamçısı olaraq möhtərəm Prezidentimiz cənab İlham Əliyev tərəfindən söz və mətbuat azadlığının qorunması, inkişafı və gücləndirilməsi istiqamətində mühüm addımlar atılır. Bu illər ərzində möhətərəm Prezidentimizin sərəncamları ilə 300 nəfərdən artıq mətbuat işçisi orden və medallarla təltif edilib, fəxri adlar alıb, Prezident Təqaüdünə layiq görülüblər. Sevindirici haldır ki, Dövlət mükafatları ilə təltif olunan mətbuat işçiləri arasında "Səs" qəzetinin əməkdaşları da var. Bütün bunlar bir daha sübut edir ki, bu gün Azərbaycanda azad və müstəqil mətbuat mövcuddur və "Səs" qəzeti azad mətbuatın bir parçası olaraq, bu gün öz missiyasını şərəflə yerinə yetirir. Qəzetimiz öz ideyasına sadiq qalaraq, bundan sonra da, xalqımızın Ümummilli Lideri Heydər Əliyev ideyalarına və möhtərəm Prezidentimizin siyasi xəttinə sadiqlik nümayiş etdirəcək.

24 il “Səs” qəzeti üçün böyük bir tarixdir. Ümumən Azərbaycan mətbuatının 140 yaşı, ikinci dəfə müstəqillik əldə etmiş Azərbaycan mətbuatının isə 24 yaşı var. Bu dövrə nəzər salanda görürük ki, qəzet müstəqillik uğrunda mübarizədə yaxından iştirak edib və öz yazıları ilə azərbaycançılıq ideologiyasının tərənnümçüsünə çevrilib. Yarandığı gündən 2005-ci ilə qədər qəzetə Ağabəy Əsgərov rəhbərlik edib, 2005-ci ildən isə mən rəhbərlik edirəm. 

- Tarixi uğurları ilə seçilən qəzetiniz hansı layihələr həyata keçirir? 

- “Səs” qəzeti müxtəlif layihələr həyata keçirir. Məsələn, 2007-ci ildən başlayaraq regionların iqtisadi inkişafı ilə bağlı regionlarda tədbirlər, dəyirmi masalar keçiririk. Redaksiyada ən aktual məsələlərin müzakirəsi ilə bağlı dəyirmi masalar təşkil olunur. Qonaqlarımız dövlət məmurları, ictimai-siyasi xadimlər olur. Qəzetimiz multimedia diskləri hazırlayaraq geniş ictimaiyyətə təqdim edib. Ulu Öndər Heydər Əliyevin hakimiyyətə gəlməsinin ildönümü ilə bağlı geniş və 3 dildə disklər hazırlayaraq ictimaiyyətə çatdırmışıq. O cümlədən Xocalı faciəsi ilə bağlı 3 dildə multimedia diski hazırlanıb. Bu disklər həm də Novosibirskdə 10 min nüsxə ilə paylanıb. 

“Səs” qəzeti Azərbaycan Respublikası Prezidenti Yanında Kütləvi İnformasiya Vasitələrinə Dövlət Dəstəyi Fondu yaranandan sonra bu Fondun dəstəyi ilə bir sıra layihələr həyata keçirib.

Onu da qeyd edim ki, 2008-ci ildə prezident seçkiləri ərəfəsində “Səs” qəzetinin bazasında cəmiyyətə obyektiv, qərəzsiz informasiya çatdırmaq məqsədi ilə “Səs” İnformasiya Agentliyi (SİA) yaradılıb. Hazırda SİA kifayət qədər hörmət qazanmış agentliklərdən biridir. 2011-ci il yanvarın 11-dən etibarən “siasport.az” saytı, fevral ayından isə “SƏSTV.az” internet televiziyası fəaliyyətə başlayıb. Bu da qəzetimizin cəmiyyətə bir töhfəsidir. İnşallah, yeni layihələrimiz var, onları da həyata keçirəcəyik.

- Bəs “Səs” qəzetinin prizmasından yanaşanda Azərbaycan mətbuatının bugünkü durumunu necə dəyərləndirirsiniz? 

- Mətbuatımız demokratik dəyərlərə əsaslanır və ölkə rəhbərliyi bu məsələyə xüsusi önəm verir. Mətbuat üzərində senzura, məhz Ulu Öndərin dövründə ləğv olunub. Bununla da Heydər Əliyevin mətbuata azadlıq, onun inkişafına bir töhfə verib. Mətbuatın problemləri daim maddi bazasının zəifliyi, imkansızlığı ilə bağlı olub. Heydər Əliyev bir sıra mətbu orqanların “Azərbaycan” nəşriyyatına olan borcunu dondurub, əlavə dəyər vergisi ləğv edilib. Bu isə birbaşa mətbuatın inkişafına xidmət edən addımlar idi. Bu ənənəni prezident İlham Əliyev davam etdirib. Mətbuatın inkişafı üçün müxtəlif illərdə dəfələrlə qəzetlərə birdəfəlik yardımlar ayrılıb. Bu gün 300-ə yaxın jurnalistə müxtəlif adlar və mükafatlar verilib. Mətbuat Şurasının yaranmasını tövsiyə edən Prezident İlham Əliyev, bu addımla Ulu Öndər Heydər Əliyev kursuna sadiq olduğunu bir daha ortaya qoyub. 2008-ci ildə mətbuatın inkişafı ilə bağlı Konsepsiyanın təsdiqlənməsi və 2009-cu ildən etibarən Azərbaycan Respublikası Prezidenti Yanında Kütləvi İnformasiya Vasitələrinə Dövlət Dəstəyi Fondunun yaradılmasını da xüsusi qeyd etmək lazımdır. Nəhayət, 2010-cu ildə jurnalistlərin mənzil şəraitinin yaxşılaşdırılması ilə bağlı Prezident dünyada analoqu olmayan bir sərəncam verib. 2013-cü ildə, mətbuatın 138 illiyində 156 jurnalist bu sərəncamdan yararlanaraq mənzillə təmin olunublar. Bu onu göstərir ki, ölkəmizdə mətbuat azaddır və onun inkişafı dövlətin daim diqqət mərkəzindədir. Mətbuat vətəndaş cəmiyyətinin inkişafında başlıca rol oynayan institut kimi qayğı ilə əhatə olunub. Prezident İlham Əliyev “Azərbaycan jurnalistlərinin dostu” mükafatını alarkən bildirdi ki, mətbuatın inkişafı istiqamətində də gələcəkdə belə addımlar atılacaq. Azərbaycan mətbuatı 1990-cı illərdən fərqli olaraq, çox sürətli bir inkişaf yolundadır. 

- SİA və SƏSTV internet televiziyasının timsalında, bu gün Azərbaycanda media sahəsində uğur qazanmaq çətin deyil ki? 

 - Ümumiyyətlə, bu gün Azərbaycanda bütün sahələrdə olduğu kimi, mətbuatda da sağlam rəqabət hökm sürür. Bunun məntiqi nəticəsi kimi bir sıra media qurumlarının, onların törəmələrinin cəmiyyətə təqdim olunduğunu misal göstərə bilərik. Azərbaycan mətbuatında azad rəqabət mövcuddur. Bu gün yalnız rəqabətə tab gətirən qəzet və agentliklər fəaliyyətini davam etdirə bilir. Bu azad rəqabət mühitində “Səs” qəzetinin, “Səs” İnformasiya Agentliyinin, yaxud SƏSTV internet televiziyasının yaşaması uğurlu hadisədir və təqdir olunmalıdır. “Səs” qəzetinin bazasında bir neçə media qurumunun yaranması və “SƏS” Media Qrupuna çevrilməsi də bu qəbildəndir. Bu gün 80 adda gündəlik qəzet işıq üzü görür. Yaxud hər gün yeni agentliklər, saytlar, portallar yaranır. Onların sırasında rəqabətə davam gətirmək çətindir. Azad rəqabət şəraitində müasir tələblərə cavab vermək, inkişaf etmək lazımdır. “Səs” Media Qrupu da bunun öhdəsindən gəlməyə çalışır.

Əlbəttə, bizə qiyməti oxucular verir...