Partiya xəbərləri
YAP Şabran rayon təşkilatında partiyanın yaranmasının 24-cü ildönümü qeyd edilib
Dünən Yeni Azərbaycan Partiyası Şabran rayon təşkilatında YAP-ın yaranmasının 24-cü ildönümü qeyd edilib.
Tədbiri giriş sözü ilə açan YAP Şabran rayon təşkilatının sədri Mehdi Balabəyov tədbir iştirakçılarına YAP-ın 24 illik fəaliyyəti, keçdiyi şərəfli yol haqqında ətraflı məlumat verib.
O bildirib ki, YAP-ın qurucusu, Ulu öndər Heydər Əliyev 1993-cü ilin iyununda - son dərəcə mürəkkəb, ağır bir dövrdə xalqın təkidli tələbi ilə ölkəyə rəhbərlik məsuliyyətini üzərinə götürməsəydi, bugünkü müstəqil, qüdrətli, sürətlə inkişaf edən, regionun lider dövlətinə çevrilən Azərbaycandan danışmaq mümkün olmazdı.
Sonra çıxış edən millət vəkili Tahir Süleymanov bildirib ki, Ulu öndərimiz Heydər Əliyevin yaratdığı YAP ölkəmizin həyatında yeni mərhələnin əsasını qoyub, yarandığı vaxtdan siyasi mübarizələrlə dolu şərəfli bir yol keçib. Onun sözlərinə görə, YAP Ulu öndər Heydər Əliyevin həyata keçirdiyi siyasətin avanqard qüvvəsi kimi xalqımızın qarşısında dayanan vəzifələrin həll edilməsinə layiqli töhfəsini verir.
Daha sonra YAP Şabran rayon təşkilatı Gənclər Birliyinin sədri Fikrət Nuşiyev qeyd edib ki, ötən 24 il müddətində partiyamız 700 minə yaxın insanı öz ətrafında birləşdirə bilib və bu, xalqımızın Heydər Əliyev ideyalarına sadiqliyinin və Prezident İlham Əliyevin siyasətini dəstəkləməsinin göstəricisidir.
F.Nuşiyev həmçinin qeyd edib ki, YAP-ın üzvləri arasında gənclər də böyük üstünlük təşkil edir və partiya sıralarına yeni qoşulanların mütləq əksəriyyəti də Azərbaycanın sağlam, intellektual gənclərindən ibarətdir.
Sonra YAP Şabran rayon təşkilatı Qadınlar Şurasının sədri Minə Quliyeva, YAP Şabran rayon təşkilatının Şura üzvü, Şabran şəhər İcmasının İnkişafı üzrə Təlim Resurs İctimai Birliyinin sədri Tofıq Əmrahov, YAP Şabran rayon təşkilatı Qadınlar Şurasının üzvü, Şabran şəhər 1 saylı uşaq bağçasının müdiri Marifə Şükürova çıxış ediblər.