YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Jurnalistlər Prezidentə minnətdarlıq edirlər: Siz 255 ailəyə böyük sevinc yaşatdınız

KİV işçiləri jurnalistlər üçün tikilən ikinci yaşayış binasının istifadəyə verilməsinin və üçüncü binanın təməlinin qoyulmasının sevincini yaşayırlar.

Redaksiyaların kollektivləri, yeni binada mənzillə təmin olunan media işçiləri Prezident İlham Əliyevə təşəkkür məktubları ünvanlamaqda davam edir, bu nəcib və xeyirxah təşəbbüsə görə dövlətimizin başçısına hədsiz minnətdarlıqlarını bildirirlər.

Azərbaycan Televiziya və Radio Verilişləri QSC kollektivinin Prezidentə ünvanlanmış məktubunda deyilir: “Möhtərəm cənab Prezident, Azərbaycanı dünyada güclü dövlətlərdən birinə çevirən, ona böyük nüfuz qazandıran amillərdən biri də Sizin rəhbərliyinizlə əhalinin sosial rifahının yüksəldilməsi sahəsində həyata keçirilən, təkcə bu günə yox, həm də gələcəyə ünvanlanan dəyərli layihələrdir. Bu siyasətin nəticələrini hər bir ölkə vətəndaşı öz gündəlik həyatında aydın şəkildə hiss edir”.

Məktubda ölkəmizdə fəaliyyət göstərən KİV-lərə hərtərəfli dəstək tədbirləri, xüsusən jurnalistlərin mənzil şəraitinin yaxşılaşdırılması ilə bağlı atılan ardıcıl addımlar dövlətimizin başçısının medianın inkişafına göstərdiyi diqqət və qayğının bariz təzahürü kimi dəyərləndirilir. Qeyd olunur ki, iki yaşayış binasının istifadəyə verilməsi, üçüncü binanın təməlinin qoyulması respublikamızın çoxminli media nümayəndələri, qələm adamları və geniş ictimaiyyət tərəfindən böyük razılıq hissi ilə qarşılanıb. İllərlə mənzil həsrətində olan yüzlərlə ailəyə böyük sevinc bəxş edilib.

“Möhtərəm Prezident, hər zaman Sizin diqqət və qayğınızı hiss edən Azərbaycan Televiziya və Radio Verilişləri QSC-nin kollektivinə də bu böyük sevincdən pay düşüb. Bu, kollektivin hər bir üzvündə böyük ruh yüksəkliyi, daha əzmlə çalışmaq, göstərdiyiniz etimad və qayğını doğrultmaq istəyi yaradıb. Bu nəcib təşəbbüsünüzə və humanist addımınıza, böyük diqqət və qayğınıza görə Sizə dərin minnətdarlığımızı bildiririk”, - deyə məktubda vurğulanır.

“Reytinq” qəzetinin baş redaktoru Afiq Mirzə də daha 255 jurnalisti mənzillə təmin etdiyinə görə dövlətimizin başçısına minnətdarlığını bildirir. O, məktubunda Prezident İlham Əliyevin kütləvi informasiya vasitələrinin inkişafına göstərdiyi maddi dəstəkdən, qayğı və diqqətdən söz açaraq yazır: “Mənzil şəraiti ağır olan bir çox jurnalisti evlə təmin etdiniz. Bu, təbii ki, mənim, həmçinin kirayələrdə yaşayan çoxsaylı jurnalistlərin də böyük sevincinə səbəb oldu. Onların sırasında “Reytinq” qəzetinin baş redaktor müavini Fazil Əhməd də var. Buna görə Sizə kollektivimizin dərin təşəkkürünü çatdırıram”.

Daha bir məktub Şirvan şəhərindən göndərilib. “Həftə içi” qəzetinin bölgə müxbiri Səxavət Məmmədli, “İşıq” qəzetinin redaktor əvəzi Fəxrəddin Rəhimov, “Dünya və biz” jurnalının əməkdaşı Qaçay Həsənli, “Təzadlar” qəzetinin müxbiri Fərhad Səlimov və başqaları yazırlar: “Mətbuat günü ərəfəsində daha 255 həmkarımızın mənzillə təmin olunması və Sizin jurnalistlərin dostu elan edilməyiniz cəmiyyətlə Prezident arasındakı qarşılıqlı və səmimi münasibətin təzahürüdür. Sizin media işçilərinə olan xeyirxah münasibətiniz hamı kimi Şirvan şəhərində yaşayan və fəaliyyət göstərən jurnalistlərin də ürəyindən xəbər verir”.

Məktubda regionların sosial-iqtisadi inkişafı Dövlət Proqramının icrası çərçivəsində həyata keçirilən layihələrdən, bunun sakinlər tərəfindən razılıqla qarşılanmasından da bəhs olunur, Şirvan şəhərinin inkişafına göstərilən diqqət və qayğıya görə dövlətimizin başçısına minnətdarlıq ifadə edilir.