YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Monteneqro Prezidenti VI Qlobal Bakı Forumunda iştirak edəcək

Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə Bakıda keçiriləcək VI Qlobal Bakı Forumunda Monteneqro Respublikasının Prezidenti Filip Vuyanoviç iştirak edəcək.

Dövlət Komitəsindən bildiriblər ki, “İnklüziv cəmiyyətlərin qurulması üçün ziddiyyətlərin uyğunlaşdırılması” mövzusuna həsr olunan Forumda Filip Vuyanoviçin çıxışı nəzərdə tutulub. Monteneqro Prezidentinin Çinin xarici siyasəti mövzusunda keçiriləcək paneldə də çıxışı planlaşdırılır.

Qeyd edək ki, Nizami Gəncəvi Beynəlxalq Mərkəzi ilə Monteneqro arasında artıq bir neçə ildir sıx əməkdaşlıq mövcuddur. Bu əməkdaşlığın nəticəsi olaraq Filip Vuyanoviç artıq üçüncü dəfədir Qlobal Bakı Forumuna qatılır. O, bundan əvvəlki IV və V Qlobal Bakı Forumlarında iştirak edib.

VI Qlobal Bakı Forumunda Monteneqro Prezidenti ilə yanaşı, Albaniya Respublikasının Prezidenti İlir Meta və digər dövlətlərin prezidentlərinin, hökumət başçılarının iştirakı gözlənilir. Forumda, həmçinin keçmiş dövlət və hökumət rəhbərləri, tanınmış ictimai-siyasi xadimlərdən ibarət 500 nəfərədək qonağın iştirakı planlaşdırılır.

Forumda əsasən beynəlxalq münasibətlərdə güc anlayışı, beynəlxalq münasibətlər sistemində meydana çıxan yeni güclər, çoxluqlar milli azlıqlara qarşı, Yaxın Şərq regionunda sülh və təhlükəsizlik məsələləri, Balkan regionunda hazırkı və gələcək vəziyyət – regional təhlükəsizlik məsələlərinin proqramı və ya yeni geosiyasi şahmat lövhəsi, Çinin xarici siyasəti, kapitalizmdə iqtisadi inkişaf və ətraf mühitin deqradasiyası məsələləri, nəsillər arasındakı bağların qırılması, dini-mədəni müxtəlifliyin siyasi liderlik uğrunda rolu kimi mövzular müzakirə olunacaq.