Xəbərlər
Hadi Rəcəbli: İcbari tibbi sığorta sisteminə keçid zaman tələb edir
«Səhiyyə sistemində icbari tibbi sığortaya keçid çox mürəkkəb, çətin islahatdır. Bütün dünyada bu prosesə keçid birmənalı olmayıb». Bu fikirləri yap.org.az saytına açıqlamasında Milli Məclisin Sosial siyasət komitəsinin sədri Hadi Rəcəbli deyib.
H.Rəcəbli bildirib ki, tibbi sığorta bütün cəmiyyəti əhatə etməlidir. Amma cəmiyyətdə müxtəlif təbəqələrin mövcudluğunu nəzərə alsaq, onlara fərqli yanaşma da olmalıdır. Onun sözlərinə görə, bu səbəbdən də Azərbaycan hökuməti bu istiqamətdə dünya təcrübəsi geniş şəkildə öyrənməkdədir.
«Bütün hallarda məqsəd odur ki, insan xəstələnəndə onun qayğısını dövlət və sığorta öz üzərinə götürsün. Eyni zamanda, bu prosesdə tibb müəssisələri, həkimlərlə bağlı işlər görüləcək. Təbii ki, sığorta sisteminə keçəndən sonra həkimlərin əməkhaqları daha da artacaq, savadlı həkimlə savadsız həkim bilinəcək. Ümumiyyətlə, burada kompleks məsələlər var ki, öz həllini tapacaq. Amma bu proses çox mürəkkəb olduğu üçün bu sistemə keçid zaman tələb edir»- deyə, komitə sədri vurğulayıb.