Xəbərlər
Cəmil Çiçək: Dağlıq Qarabağ münaqişəsi həll edilmədikcə Cənubi Qafqazda sülh bərqərar olmayacaq
Rusiyada səfərdə olan Türkiyə Böyük Millət Məclisinin (TBMM) sədri Cəmil Çiçək TASS agentliyində keçirdiyi mətbuat konfransında Ermənistan-Azərbaycan, Dağlıq Qarabağ münaqişəsinin həlli məsələsindən də danışıb. O, Dağlıq Qarabağ münaqişəsinin həlli ilə əlaqədar Türkiyənin mövqeyinin bəlli olduğunu bildirərək deyib: “Biz imkan olduqca bu haqsızlığın bütün səviyyələrdə keçirilən görüşlərdə müzakirə edilməsinə çalışırıq. Türkiyə ATƏT-in Minsk qrupunun fəaliyyətindən narazıdır. Münaqişə başlayan vaxtlarda dünyaya gəlmiş uşaqlar bu gün artıq 22-23 yaşlarındadır, bir milyondan artıq insan yerindən-yurdundan didərgin düşüb. Lakin təəssüf ki, beynəlxalq aləmdə bu məsələyə münasibətdə ikili standartlar nümayiş olunur”.
Türkiyə parlamentinin sədri vurğulayıb ki, Dağlıq Qarabağ münaqişəsi həll edilmədikcə Cənubi Qafqazda sülh bərqərar olmayacaq. Bölgədə sülhün bərqərar olması üçün bu münaqişənin həll edilməsi vacibdir. Təəssüf ki, Minsk qrupunun problemin həlli istiqamətində vasitəçilik səyləri heç bir nəticə vermir və bu haqsızlıq hələ də davam edir.