Xəbərlər
Gələcəyimizin naminə...
Teyyubə Hüseynova
Əməkdar müəllim
XX yüzillikdə Azərbaycanın ictimai-siyasi, mədəni həyatının tarixi uğurlarından biri müasir Azərbaycan qadınının fenomen kimi qərarlaşmasıdır. Azərbaycan müstəqillik qazandıqdan sonra qadınların cəmiyyətdə rolu daha da artmışdır. Eyni zamanda qadın hüquqlarının qorunması üçün mühüm qərarlar qəbul olunmuşdur. Tariximizə nəzər salanda görkəmli qadın hökmdarlarımız, sərkərdələrimiz, qəhrəmanlarımız ilə fəxr edirik. Gəlin, etiraf edək ki. Tomris kimi, Nüşabə kimi qadın hökmdarlarımız, hökmdarlar dünyaya gətirmiş Aləm Şah Bəyim, görkəmli diplomat Sara Xatun poeziyası ilə könüllər oxşayan Məhsəti Gəncəvi, Heyran xanım və başqa qəhrəman qadınlarımız buna bariz misaldır. Memarlıq, səhiyyə, elm, təhsil mədəniyyət və digər sahələrdə uğurla çalışan qadınlarımızın qazandığı nəaliyyətlər, apardığı tədqiqatlar, yaratdığı əsərlər Azərbaycanın parlaq səhifəsidir.
Son zamanlarda mətbuatda qadına şiddət, zorakılıq, ədalətsiz yanaşma, erkən nikahlar, narkotik aludəçiliyi, insan alveri kimi məsələlərdən çox danışılır. Bunlar hamısı insanlığa qarşı cinayətdir və bütün dövrlərdə, bütün dünyada rast gəlinən cinayətlərdir. Bu cinayətləri heç bir halda milli təfəkkürə mentalitetə bağlamaq olmaz.
İslam dinini düzgün anlayan və onun humanist dəyərlərini mənimsəyən bir xalq kimi bizim cəmiyyətimizdə qadın həmişə uca tutulub, qadın, ana, bacı, qız övladının sözü keçərli olub. Ən patriarxal ailələrdə belə son sözü anaların, qadınların gözləri deyib. Ərini, oğlunu qardaşını qapıdan yola salan ana, gəlin, bacı deyib. Milli-mənəvi dəyərlərimizi, qadın zərifliyini, ana müqəddəsliyini qoruyub saxlamaq üçün Azərbaycan qadınına qeyrətli Azərbaycan oğulları hər zaman lazımdır. Milli-mənəvi dəyərimiz qadına hər an səbirli və təmkinli olmağı, qarşılaşdığı hər münasibətə ən gözəl qarşılığı verməyi, təmkinli davranmağı, nəcib xanımlara məxsus davranış nümayiş etdirməyi göstərir.
Yaranışdan gözəl olan Azərbaycan xalqı tarixin süzgəcindən keçmiş çox yüksək milli-mənəvi dəyərlərə malikdir. Bu dəyərlər xalqımızı daha da güclü edir, milli həmrəylik, milli birlik ruhunun yaranmasına kömək edir. Bu dəyərlər bizim tariximiz, dilimiz, dinimiz, adət-ənənəmiz, milli mentalitetimiz, mədəniyyətimizdir.
Ümummilli liderimiz Heydər Əliyev Şərqlə Qərb arasında körpü rolunu oynayan ölkəmizin iki qitə arasında barışdırıcı mövqeyinə diqqət çəkərək deyirdi ki, «Biz Avropa qitəsinə daxilik. Amma Avropa ilə Asiya arasında biz öz ölkəmizdə, tariximizdə, milli mədəniyyətimizdə, tarixi köklərdə və mentalitetdə Şərqlə Qərbin, Avropa ilə Asiyanın sintezini təşkil edirik».
Dilimizdə aforizmə çevrilmiş bir deyim var: “ailə dövlətin əsasıdır”. Qadınlarımızın ailədəki yeri və əhəmiyyətini nəzərə alsaq, onların dövlətçilikdə nə kimi yüksək statusa malik olduğu aydınlaşar. Hər bir xalın özünəməxsus keyfiyyətləri, fərqli tərəfləri özünü ən çox ailə- məişət münasibətlərində göstərir. Kim nə deyirsə desin, bir avropalını bir azərbaycanlıdan fərqləndirən ən böyük cəhət onların həyata baxışı və ailə münasibətləri anlayışıdır. Bir avropalı üçün ailə komfort həyat, isti bir yuva deməkdirsə, bir azərbaycanlı üçün fədəkarlıq, qarşılıqlı ehtiram, məsuliyyət hissi deməkdir. Gəlin etiraf edək ki, bu fədəkarlıq yükünü Azərbaycan qadını daha çox çəkir. Azərbaycan qadını milli dəyərləri və inancları, valideynin qarşısında qoyduğu vəzifələri dərindən dərk etdiyindəndir ki, o gözəl anadır, yaxşı valideyndir. Çünki islama görə Allah bizə verdiyi övladla birlikdə, valideyn vəzifəsi də verir və biz övlada baxmaqla əslində Allah qarşısında borcumuzu yerinə yetirmiş oluruq. Azərbaycan qadını övlad tərbiyəsində müsəlmançılığa xas olan “qızıl ortam”, yəni ərköyünlüklə, gözüqıpıqlıq arasındakı “qızıl orta”mı tuta bilmək bacarığına malikdir. Tərbiyə üçün tərbiyə göstərmək bacarığına malikdir.
Qadın insanı dünyaya gətirən, onu yetişdirən möhtəşəm varlıqdır. Onun qəlbi sevgi ilə ilmək- ilmək toxunmalıdır ki, uşaqlarını o sevgiylə qorusun , böyütsün cəmiyyətə faydalı insanlar edə bilsin. Bu baxımdan qadın ailənin və bilavasitə cəmiyyətin təməl daşıdır. Onun mükəmməlliyi deməkdir. Elə bunun nəticəsidir ki, uzun illərdir ki, ölkəmizin ictimai-siyası həyatında mühüm və fəal rol oynayan, ölkəmizin və xalqımızın maraqlarını hər şeydən üstün tutan ümummilli etimad ünvanı olan nəcib müsəlman qadını Mehriban Əliyeva Azərbaycan Respublikasının birinci vitse- prezidentidir. Vətəninə, xalqına xidmət, mərhəmət və ədalət, tolerantlıq və ümumbəşəri dəyərlərə sədaqət Mehriban xanımın önəm verdiyi prinsiplərdir.
Azərbaycan qadınına xas mükəmməlliyin nəticəsidir ki, Azərbaycan qadını “Öncə vətəndir”, “Vətən sağ olsun” deyərək öz sevgili övladlarını vətən yolunda qurban verirlər. Mənəviyyatı güclü olan müsəlman qadını başa düşür ki, həyatın mənası mənəviyyatdır. Maddiyatda nə isə az da ola bilər, olmaya da bilər. Ən əsası odur ki, milli birliyimizi qoruyaq, saxlayaq. Bir şeyi yaddan çıxarmayaq ki, tarixən analarımız ayaqları ilə od ayaqlayıb, gözləri ilə od götürüb. Analarımız yağıya yaman olub, səbri ümman olub.
Bu gün cəmiyyətimizin güclü olması ilk növbədə ailələrin güclü olmasından irəli gəlir. Xoşbəxt ailədə göz açan övlad isə, sağlam gələcəyin təminatçısıdır. Gələcəyimiz naminə baş verən neqativ halların aradan qaldırılması üçün hər birimiz mütəşəkkil olmalı və bu hallara qarşı çıxmalıyıq.