Xəbərlər
YAP Nərimanov rayon təşkilatının fəal gəncləri Milli Qəhrəman Əliyar Əliyevin büstünü ziyarət ediblər
Yeni Azərbaycan Partiyası Nərimanov rayon təşkilatının üzvü olan bir qrup gənc Milli Qəhrəman Əliyar Əliyevin doğum günü münasibətilə onun rayon ərazisində yerləşən büstünü ziyarət edib. Ziyarət çərçivəsində gənclər Milli Qəhrəmanın büstü ətrafında təmizlik, abadlıq işləri aparıblar. Daha sonra şəhid mayor Əliyar Əliyevin büstünün önünə gül dəstələri düzülərək qəhrəmanımızın əziz xatirəsi yad edilib.
Qeyd edək ki, Əliyar Əliyev 1957-ci il dekabrın 14-də Qubadlı rayonunun Qazyan kəndində anadan olub. 1979-cu ildə Azərbaycan Dövlət Bədən Tərbiyəsi İnstitutunu fərqlənmə diplomu ilə bitirərək, bir müddət Qubadlı rayonunun Dondarlı kənd orta məktəbində idman müəllimi işləyib. Qarabağ müharibəsi başlayanda Əliyar Əliyev könüllü olaraq Azərbaycan Silahlı Qüvvələrinin sırasına qoşulub. Əvvəlcə taborun kəşfiyyat bölməsinin komandiri, sonra tabor komandirinin təchizat üzrə müavini təyin edilib.
1992-ci il sentyabrın 30-da Laçın rayonu istiqamətində döyüşə rəhbərlik edib. O, həmin ilin payızında 40 könüllü döyüşçü ilə birlikdə işğal altındakı Laçının 40-a qədər kəndini dörd gün ərzində ermənilərdən azad edib. Milli Qəhrəmanın son döyüşü 1992-ci il oktyabrın 3-də Laçının iki kilometrliyində olub. “Tikanlı zəmi” yüksəkliyi uğrunda döyüşdə tabor komandiri Əliyar Əliyev və onun sürücüsü Əlisadət Ağayev qəhrəmancasına həlak olublar. O, Qubadlı rayonunun Qəzyan kəndində dəfn olunub.
Digər işğal altında olan torpaqlarımızla birlikdə Qubadlı da düşmən tapdağından azad edildikdən sonra Milli Qəhrəmanımızın məzarı bərpa olunub.
