Xəbərlər
Astarada şəhidin xatirəsinə həsr olunan bulağın açılışı olub
Astara rayonunun Maşxan kəndində şəhid Cahangirov Rauf Xəyyam oğlunun əziz xatirəsinə həsr olunan bulağın açılış mərasimi keçirilib.
Tədbirdə YAP Astara rayon təşkilatının sədri Həbib Cəfərov, Astara Rayon İcra Hakimiyyəti başçısının müavini İlqar Malıyev, Şəhid ailələri və qazilərlə iş şöbəsinin müdiri Turan Həsənzadə, şəhid ailələri, qazilər və rayon ictimaiyyəti iştirak ediblər.
YAP Astara rayon təşkilatının sədri Həbib Cəfərov və Astara Rayon İcra Hakimiyyəti başçısının müavini İlqar Malıyev çıxış edərək Prezident, Müzəffər Ali Baş Komandan İlham Əliyevin rəhbərliyi, Ordumuzun rəşadəti, xalqımızın birliyi sayəsində 44 günlük İkinci Qarabağ müharibəsində tarixi Zəfərə imza atan Azərbaycanın qəhrəman oğullarının şücaətindən, Vətən, torpaq sevgisindən geniş bəhs ediblər. Vətən müharibəsinin qəhrəmanları olan şəhidlərimizin ruhu qarşısında baş əyib, qazilərimizə şəfa diləyiblər.
Şəhid ailələrinin üzvləri, qazilər onlara göstərilən diqqət və qayğıya görə dövlət başçısı, Müzəffər Ali Baş Komandan İlham Əliyevə, Azərbaycanın Birinci vitse-prezidenti Mehriban xanım Əliyevaya minnətdarlıqlarını bildiriblər.
Çıxışlarda bir daha vurğulanıb ki, şəhidlər ölməzdir. Onların qəhrəmanlığı, şücaəti gənclərimiz üçün örnəkdir, həyat yolları vətənpərvərlik məktəbidir. Şəhidlərimizin xatirəsi xalqımızın qəlbində əbədi yaşayacaq. Onlar milli iftixarımızdır.