Xəbərlər
Münasibətlər yeni geosiyasi reallıqlara uyğun olaraq inkişaf etdirilir
Gündüz Bayramov
YAP Samux rayon təşkilatının sədri
Türk dövlətləri ilə əməkdaşlığın inkişafı Azərbaycanın xarici siyasətinin, beynəlxalq səviyyədə tərəfdaşlığının prioritet istiqamətlərindəndir. Bu gün Azərbaycanın türkdilli dövlətlərlə intensivləşən münasibətləri yeni geosiyasi reallıqlara uyğun olaraq inkişaf etdirilir və strateji xarakter alır. Türk dünyası böyük bir ailədir. Qırğızıstan, Qazaxıstan, Özbəkistan, Türkmənistanla münasibətlərimiz çoxşaxəli olmaqla bərabər, eyni zamanda, milli-mənəvi maraqlara bağlılığı ilə seçilir. Bunun da ən əsas səbəbindən biri həmin dövlətlərin xalqları ilə ortaq milli-mənəvi dəyərləri bölüşməyimizdir.
Azərbaycan Mərkəzi Asiya ölkələri arasında Qırğız Respublikası ilə münasibətlərə böyük önəm verir. Azərbaycan və qırğız xalqları arasında tarixən ənənəvi dostluq və qardaşlıq əlaqələri mövcud olub. Bu iki ölkə arasındakı uğurlu dövlətçilik münasibətlərinin əsası məhz Ümummilli Lider Heydər Əliyev tərəfindən qoyulub.Azərbaycanla Qırğızıstan arasında diplomatik münasibətlər 1993-cü il yanvarın 19-da qurulub. Ulu Öndər 1995-ci ilin avqustunda Türkdilli Dövlət Başçılarının III Zirvə Görüşü və “Manas” eposunun 1000 illiyinə həsr olunmuş tədbirlərdə iştirak etmək üçün ilk dəfə Qırğızıstana səfər edib. 2007-ci ildə Azərbaycanın Qırğızıstanda səfirliyi, 2008-ci ildə isə Qırğızıstanın Bakıda səfirliyi fəaliyyətə başlayıb. Qırğız Respublikasında 20 minə yaxın azərbaycanlı yaşayır ki, onların da əksəriyyəti Mərkəzi Asiyaya sürgün edilən repressiya qurbanlarının ailə üzvləridir. Həmvətənlərimiz Bişkek, Karabalta, Kant, Sokuluk, Oş şəhərlərində və ətraf rayonlarda yığcam halda məskunlaşıblar.
Hazırda iki ölkənin möhkəm təməllər üzərində qurulan münasibətləri yüksələn xətlə inkişaf edir. Qırğız Respublikasının Prezidenti Sadır Japarovun aprel ayının 24-də Azərbaycana etdiyi rəsmi səfəri ölkələrimiz arasında dostluq münasibətlərinin dərinləşməsinə, əməkdaşlıq əlaqələrinin daha da inkişafına xidmət etməklə böyük əhəmiyyət kəsb edir. Görüş zamanı Azərbaycan və Qırğızıstan arasında ikitərəfli və çoxtərəfli əməkdaşlıq üzrə aktual məsələlərə dair danışıqlar, qarşılıqlı maraq doğuran beynəlxalq və regional mövzular üzrə fikir mübadiləsi aparılıb. İmzalanmış sənədlər ölkəmizin Qırğızıstanla iqtisadi potensialının daha da artırılmasına, eləcə də türk dünyasının bir-birinə inteqrasiyasına böyük töhfələr verəcəkdir.
Hər iki ölkənin dövlət başçıları sənədlərin imzalanması mərasimindən sonra mətbuata bəyanatlarla çıxış ediblər. Öz çıxışında Azərbaycan Prezidenti İlham Əliyev vurğulayıb ki, qarşılıqlı fəaliyyətin gündəliyi kifayət qədər genişdir. Həmçinin Dövlətlərarası Şuranın ikinci iclasının uğurla keçdiyi, imzalanmış sənədlərin qarşılıqlı fəaliyyətin möhkəmləndirilməsinə, ticarət dövriyyəsinin artmasına və bütün istiqamətlər üzrə əməkdaşlığın genişləndirilməsinə praktiki müstəvidə böyük töhfələr verəcəyi diqqətə çatdırılıb. Dövlət başçısı Qırğızıstan Prezidentinin təşəbbüsü ilə Ağdam rayonunda tikiləcək orta məktəbə görə minnətdarığını bildirib. Bu qardaş dəstəyinin əyani təzahürüdür.
Əminliklə deyə bilərik ki, Qırğız xalqının böyük oğlu, dünyaşöhrətli yazıçı, həyatı boyu həm Sovet İttifaqı məkanında, həm də dünya miqyasında öz xalqını layiqincə təmsil etmiş Çingiz Aytmatovun Bakıda abidəsinin açılışı böyük mədəni hadisədir və bu abidə dövlətlərimiz arasında dostluğun daha da möhkəmlənməsinə xidmət edəcək. Aytmatov Azərbaycanda çox yaxşı tanınır və sevilir. Azərbaycan və Qırğızıstan arasında münasibətlərin möhkəmlənməsi işində xidmətlərinə görə Çingiz Aytmatov Azərbaycan dövlətinin yüksək mükafatı olan “Dostluq” ordeni ilə təltif edilmişdir. Abidənin açılış mərasimində çıxış edən cənab Prezident İlham Əliyevin də qeyd etdiyi kimi, Çingiz Aytmatovun abidəsinin açılışı dostluğumuzun, qardaşlığımızın və birliyimizin daha bir rəmzi olacaq.