Xəbərlər
Azərbaycan dünyanın diqqət mərkəzində
Bayram Aslanov
YAP İdarə Heyətinin üzvü, YAP Gəncə şəhər təşkilatının sədri
30 ölkədən 64 beyin mərkəzinin nümayəndələrinin iştirakı ilə ADA Universitetində keçirilən “COP29 və Azərbaycan üçün Yaşıl Baxış” mövzusunda beynəlxalq forum Azərbaycanı bir daha dünyanın diqqət mərkəzinə çevrdi.
BMT Təhlükəsizlik Şurası, Qoşulmama Hərəkatı və Türk Dövlətləri Təşkilatı kimi beynəlxalq təsisatlarda uğurla sədrlik etmiş Azərbaycanın yenidən beynəlxalq tədbirə ev sahibliyi etməsi qalib ölkəmizin qlobal miqyasda gücünün, etibarlı tərəfdaş nüfuzunun təsdiqidir. Məhz bunun üçün də noyabr ayında on minlərlə iştirakçı iqlim dəyişikliyi nöqteyi-nəzərindən planetimizin gələcəyini müzakirə etmək üçün COP29-la bağlı Bakıya toplaşacaq.
Aprelin 23-də “COP29 və Azərbaycan üçün Yaşıl Baxış” mövzusunda beynəlxalq forum da öz növbəsində regional təhlükəsizlik, enerji keçidi və yaşıl artımla bağlı Azərbaycanın baxışının təqdim olunmasına, Qarabağda yaşıl və ekoloji cəhətdən təmiz zonaların yaradılmasına, Azərbaycanda külək və günəş enerjisi layihələrinin, Avropa İttifaqına qədər uzanan yaşıl enerji dəhlizlərinin gələcəyi və digər mövzular baxımından yanaşmasını təqdim etməklə qlobal siyasət müzakirələrinə töhfə olacaq.
Dünyanın müxtəlif nüfuzlu beyin mərkəzlərinin nümayəndələrinin iştirak ediyi forumda Prezident cənab İlham Əliyev iştirakçıların çoxsaylı suallarını cavablandırarkən bildirib ki, üzv dövlətlər arasında vaxtaşırı iqtisadi fikir ayrılıqları meydana gəlir və dediyim kimi, Ermənistan istisna olmaqla, Avrasiya İqtisadi İttifaqının bütün üzvləri ilə bizim çox yaxşı münasibətlərimiz, o cümlədən iqtisadi əlaqələrimiz var. Biz çəkişmə vəziyyətində olmaq və ya iqtisadi tərəfdaşlarımıza xələl gətirə biləcək addımlar atmaq məcburiyyətində qalmaq istəmirik. Bir daha təkrar edirəm ki, beynəlxalq təsisatlarda üzvlüklə bağlı atdığımız bütün addımlarımız hər zaman praqmatizmə əsaslanıb. Bunu Qoşulmama Hərəkatına üzvlüyümüzlə bağlı da söyləyə bilərəm. Biz 10 ildən bir az artıqdır ki, Qoşulmama Hərəkatına üzv olmuşuq. Bu, düşünülmüş və düzgün təhlil edilmiş addım idi. Bundan sonra biz bu təsisatda sədrliyi öz üzərimizə götürdük, imkanlarımızı nümayiş etdirdik və çoxsaylı dostlar qazandıq.
Forum iştirakçılarının regional və qlobal əhəmiyyət daşıyan suallarına cavab verən ölkə başçımız cənab İlham Əliyev Azərbaycanın dünyada tutduğu mövqeyə diqqət çəkərək bildirib ki, bu gün Azərbaycanda ciddi və ya potensial qaydada yarana biləcək hər hansı risk yoxdur. Üzləşə biləcəyimiz yeganə potensial risklər isə xaricdən gələ bilər. Bu səbəbdən də Azərbaycan düşünülmüş siyasət yürütməyə məcburdur. Belə ki, risklərlə üzləşməmək üçün qapılarımız hərc-mərclik yaradanların üzünə bağlı, sadiq qonaqlarımızın üzünə isə açıq saxlanmalıdır.
Beynəlxalq tədbirdə Azərbaycanın yeni dövr üçün prioritet və hədəflərini açıqlayan Prezident cənab İlham Əliyev ölkəmizin xoşniyyətli bütün təkliflər üçün açıq olduğunu bildirdi və Cənubi Qafqazda sabitliyin təminatının, yeni dövrün tələblərinə uyğun addımların atılmasının vacibliyini vurğuladı: COP29-un keçirilməsi bizə həvalə edilməmişdən əvvəl biz ekoloji problemlərlə ciddi məşğul olurduq və iqlim dəyişikliyinin mənfi fəsadlarını azaltmağa çalışırdıq.
“Biz müstəqil ölkə kimi yaşayıb uğur qazanmalıyıq ki, Azərbaycan xalqına seçimimizin, həyat tərzimizin regionda ən yaxşı olduğunu nümayiş etdirək.”-deyə vurğulayan Liderimiz cənab İlham Əliyev onu da diqqətə çatdırıb ki, Azərbaycanın təhlükəsizliyi, inkişafı və sabitliyi ən vacib məsələdir. Ölkəmizin İkinci Qarabağ müharibəsində zəfər çalması və ardınca suverenliyini tam bərpa etməsi regionda dayanıqlı sülhə də birbaşa rəvac verib. Ən başlıçası isə Qalib Lider İlham Əliyevin tam müstəqil siyasəti Azərbaycanı regionda və dünyada öz mövqelərini sürətlə möhkəmləndirən ölkə kimi tanıdır.