Xəbərlər
Strateji tərəfdaşlığın yeni zirvəsi və tarixi sülh addımı
Nihad Allahyarlı
YAP Gənclər Birliyinin üzvü
Azərbaycan Respublikasının Prezidenti İlham Əliyevin 7-8 avqust 2025-ci il tarixlərində Amerika Birləşmiş Ştatlarına işgüzar səfəri ölkəmizin siyasi tarixində mühüm və dönüş nöqtəsi kimi yadda qalacaq. Dünyanın bir nömrəli paytaxtında, Ağ Evdə, dünyanın ən qüdrətli Prezidenti Donald Trampın iştirakı ilə imzalanan sənədlər həm Azərbaycan-ABŞ münasibətlərində, həm də Cənubi Qafqazda sülhün təmin olunmasında yeni bir mərhələnin əsasını qoydu.
Səfərin əsas nəticələrindən biri Azərbaycan Respublikası ilə Amerika Birləşmiş Ştatları arasında “Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında” Anlaşma Memorandumunun imzalanması oldu. Enerji, ticarət, tranzit, süni intellekt, rəqəmsal infrastruktur, müdafiə və təhlükəsizlik kimi prioritet istiqamətləri əhatə edəcək bu sənəd, iki ölkə arasında əməkdaşlığı institusional müstəviyə daşıyaraq qarşılıqlı münasibətləri yeni zirvəyə yüksəldir.
Prezident Trampın Prezident İlham Əliyevlə görüş çərçivəsində ABŞ Konqresinin 1992-ci ildə qəbul etdiyi 907-ci düzəlişin tətbiqini dayandırması Azərbaycan üçün mühüm siyasi və rəmzi hadisə oldu. Bu qərar uzun illər davam edən ədalətsiz yanaşmaya son qoyaraq Azərbaycan-ABŞ münasibətlərinin gələcək inkişafı üçün möhkəm zəmin yaratdı.
Ağ Evdə, Azərbaycan və Ermənistan liderləri tərəfindən sülh sazişi layihəsinin paraflanması, ATƏT-in Minsk Qrupu və əlaqəli strukturların fəaliyyətinə son qoyulması ilə müşayiət olundu. ABŞ Prezidenti Donald Trampın da şahid qismində iştirak etdiyi Birgə Bəyannamə bölgəyə dayanıqlı sülhün gətirilməsi istiqamətində qəti iradəni təsdiqlədi. Bu sənəddə Azərbaycanın əsas hissəsi ilə Naxçıvan Muxtar Respublikası arasında maneəsiz bağlantının təmin olunması, həmçinin “Beynəlxalq Sülh və Rifah naminə Tramp Marşrutu”nun reallaşdırılması nəzərdə tutulur.
Səfər çərçivəsində SOCAR ilə ExxonMobil arasında “Əməkdaşlıq haqqında Memorandum” imzalandı. Bu əməkdaşlıq, Azərbaycanda yeni enerji ehtiyatlarının kəşfi və işlənməsi istiqamətində mühüm imkanlar açır, ölkəmizin qlobal enerji bazarındakı mövqeyini daha da möhkəmləndirir.
Azərbaycan Prezidenti İlham Əliyevin ABŞ-yə səfəri bir daha nümayiş etdirdi ki, güclü liderlik, uzaqgörən siyasət və xalqın dəstəyi ilə ölkəmiz beynəlxalq münasibətlər sistemində layiqli yerini möhkəmləndirməkdə davam edir. Azərbaycan tarixinin qızıl səhifələrindən biri kimi yaddaşlarda qalacaq bu səfər təkcə diplomatik uğur deyil, həm də Azərbaycan xalqının milli iradəsinin, ədalət və sülh yolundakı qətiyyətinin parlaq göstəricisidir.