Xəbərlər
Enerji sahəsində əməkdaşlıq perspektivləri genişlənir
Təvəkkül Əliyev
YAP Şuşa rayon təşkilatının sədri
Yanvarın 8-də Bakıda keçirilən “Xızı-Abşeron” Külək Elektrik Stansiyasının açılışı Azərbaycanın enerji siyasətində yeni mərhələnin rəmzinə çevrildi. 240 meqavat gücə malik bu stansiyanın istismara verilməsi ölkənin bərpaolunan enerji sahəsində ardıcıl və məqsədyönlü fəaliyyətinin nəticəsidir. Prezident İlham Əliyevin açılış mərasimində səsləndirdiyi fikirlər göstərdi ki, bu layihə təkcə texniki nailiyyət deyil, uzunmüddətli strateji baxışın praktik təzahürüdür və ölkənin enerji təhlükəsizliyini daha da möhkəmləndirir.
Dövlət başçısı çıxışında qeyd etdi ki, son iyirmi il ərzində Azərbaycanın enerji infrastrukturu əsaslı şəkildə yenilənib, generasiya gücləri əvvəlki dövrlərlə müqayisədə dəfələrlə artıb. Bu gün ölkənin ümumi istehsal potensialı daxili tələbatı tam qarşılayır və eyni zamanda ixrac imkanlarını genişləndirir. Ənənəvi enerji mənbələri ilə yanaşı, yaşıl enerjinin sistemə inteqrasiyası bu siyasətin əsas prioritetlərindən biri kimi müəyyən edilib və Xızı-Abşeron stansiyası bu yanaşmanın mühüm tərkib hissəsidir.
Açılış mərasimində çıxış edən “ACWA Power” şirkətinin nümayəndəsi Prezident İlham Əliyevin liderlik keyfiyyətlərini xüsusi vurğuladı. Onun sözlərinə görə, Azərbaycanda formalaşdırılmış şəffaf və etibarlı idarəetmə mühiti xarici investorlar üçün geniş imkanlar yaradır. Məhz bu mühit sayəsində ölkəyə gələn sərmayədarlar yalnız layihələrin icraçısına deyil, həm də Azərbaycanın uğurlarının tərəfdarına çevrilirlər. Bu əməkdaşlıq qarşılıqlı etimad üzərində qurulmuş nümunəvi tərəfdaşlıq modelidir.
Prezident İlham Əliyevin beynəlxalq platformalarda, xüsusilə COP29-da səsləndirdiyi mövqelər də bu layihənin ideoloji əsasını təşkil edir. Dövlət başçısı qlobal inkişafın yalnız bir enerji mənbəyinə əsaslana bilməyəcəyini, müxtəlif enerji növlərinin balanslı şəkildə birgə tətbiqinin vacibliyini vurğulayıb. Azərbaycanın zəngin təbii ehtiyatları və düzgün idarəetmə modeli bu konsepsiyanın real həyata keçirilməsinə imkan verir və ölkəni qlobal enerji dialoqunun fəal iştirakçısına çevirir.
Enerji strategiyasının tərkib hissəsi kimi gələcək planlar da mərasimdə diqqət mərkəzində oldu. Bərpaolunan enerjinin həcminin artması enerji saxlanması infrastrukturunun yaradılmasını zəruri edir. Bu məqsədlə Batareya Enerji Saxlanc Sistemlərinin tətbiqi, eləcə də Xəzər dənizində duzsuzlaşdırma layihələrinin reallaşdırılması nəzərdə tutulur. Bu addımlar təkcə enerji deyil, həm də su təhlükəsizliyinin təmin edilməsinə yönəlmiş kompleks yanaşmanın göstəricisidir.
“Xızı-Abşeron” Külək Elektrik Stansiyasının açılışı Azərbaycanın inkişaf modelinin mahiyyətini açıq şəkildə ortaya qoyur. Güclü liderlik, uzunmüddətli strateji planlama və etibarlı beynəlxalq tərəfdaşlıq ölkənin davamlı tərəqqisinin əsas sütunlarıdır. Həm Prezident İlham Əliyevin çıxışı, həm də tərəfdaş şirkətin mövqeyi sübut edir ki, Azərbaycan bu gün təkcə regional deyil, qlobal miqyasda enerji sahəsində söz sahibi olmağa doğru inamla irəliləyir.