Xəbərlər
Qarşılıqlı etimad, strateji tərəfdaşlıq
Abbas Əliyev
YAP Abşeron rayon təşkilatının sədri
Azərbaycan ilə Türkmənistan arasında münasibətlər son illərdə keyfiyyətcə yeni mərhələyə qədəm qoyaraq hərtərəfli əməkdaşlıq nümunəsinə çevrilib. Ortaq tarixə, mədəni köklərə və türk kimliyinə əsaslanan bu münasibətlər siyasi, iqtisadi və humanitar sahələrdə davamlı şəkildə inkişaf edir. Türkmənistan Prezidenti Sərdar Berdiməhəmmədovun 2026-cı il iyunun 22-də Azərbaycana etdiyi dövlət səfəri də iki ölkə arasındakı strateji tərəfdaşlığın növbəti mühüm göstəricisi oldu.
Azərbaycan və Türkmənistan xalqları əsrlər boyu eyni mənəvi məkanı bölüşmüş, ortaq adət-ənənələr və dəyərlər ətrafında formalaşmışlar. Müstəqillik əldə etdikdən sonra bu tarixi yaxınlıq dövlətlərarası münasibətlərdə də öz əksini taparaq qarşılıqlı etimad və əməkdaşlıq mühitinin yaranmasına şərait yaradıb. Diplomatik münasibətlərin qurulmasından ötən dövr ərzində tərəflər müxtəlif istiqamətlərdə əlaqələri genişləndirərək onları strateji səviyyəyə yüksəltməyə nail olublar.
Bu gün Bakı ilə Aşqabad arasında siyasi dialoq yüksək səviyyədə davam edir. Dövlət rəhbərləri arasında mövcud olan qarşılıqlı hörmət və səmimi münasibətlər əməkdaşlığın daha da dərinləşməsinə xidmət edir. Hər iki ölkə beynəlxalq təşkilatlar çərçivəsində bir-birinin təşəbbüslərini dəstəkləyir, regional təhlükəsizlik və inkişaf məsələlərində ortaq mövqe nümayiş etdirir.
Prezident İlham Əliyev Türkmənistan Prezidentinin səfərini iki ölkə arasındakı qardaşlıq münasibətlərinin inkişafında mühüm hadisə kimi qiymətləndirərək əməkdaşlığın bütün istiqamətlər üzrə geniş perspektivlərə malik olduğunu vurğulayıb. Səfər zamanı keçirilən görüşlərdə siyasi əlaqələrdən iqtisadi əməkdaşlığa, humanitar münasibətlərdən nəqliyyat və enerji layihələrinə qədər bir çox məsələlər ətrafında ətraflı fikir mübadiləsi aparılıb.
Azərbaycan rəhbərliyi Türkmənistanın son illərdə əldə etdiyi sosial-iqtisadi uğurları yüksək qiymətləndirir. Müasir infrastrukturun yaradılması, şəhərlərin inkişafı, iqtisadiyyatın şaxələndirilməsi və beynəlxalq nüfuzun artması Türkmənistanın davamlı inkişaf strategiyasının uğurlu nəticələri kimi dəyərləndirilir. Eyni zamanda Azərbaycan hər zaman Türkmənistanın beynəlxalq arenada həyata keçirdiyi neytrallıq siyasətini dəstəkləyərək qardaş ölkənin uğurlarını öz uğuru kimi qəbul edir.
İki ölkə arasındakı dostluq münasibətləri Qarabağ və Şərqi Zəngəzurda aparılan bərpa və quruculuq prosesində də özünü göstərir. Türkmənistanın Füzuli şəhərində məscid kompleksinin inşasına dəstək verməsi qardaşlığın və həmrəyliyin bariz nümunəsidir. Bu layihə yalnız dini və memarlıq əhəmiyyəti daşımır, həm də iki xalq arasında mənəvi bağlılığın rəmzi kimi çıxış edir.
Səfər çərçivəsində Türkmənistan Prezidenti işğaldan azad olunmuş ərazilərə səfər edərək həyata keçirilən yenidənqurma işləri ilə tanış olub. Şuşada və Füzulidə aparılan layihələr qonaqlara Azərbaycanın bölgədə yaratdığı yeni inkişaf modelini yaxından görmək imkanı verib.
Azərbaycan və Türkmənistan arasında qarşılıqlı hədiyyə ənənələri də münasibətlərin xüsusi məzmun daşıdığını göstərir. Qarabağ və Axaltəkə atlarının dövlət başçılarına təqdim olunması türk xalqlarının ortaq mədəni irsinə, qədim ənənələrinə və dostluq bağlarına verilən yüksək dəyərin ifadəsidir. Bu jestlər sadəcə diplomatik nəzakət nümunəsi deyil, həm də xalqları birləşdirən mənəvi körpünün simvoludur.
Bütün bunlar göstərir ki, Azərbaycan–Türkmənistan münasibətləri möhkəm tarixi təməllərə söykənir və qarşılıqlı etimada əsaslanır. Ortaq dəyərlər üzərində qurulan bu əməkdaşlıq gələcəkdə də yeni uğurların əldə olunmasına, regionda sabitliyin və rifahın möhkəmlənməsinə mühüm töhfələr verəcəkdir.