Xəbərlər
15 iyun 1993-cü il: tariximizin ən parlaq səhifələrindən biri
Abbas Əliyev
YAP Abşeron rayon təşkilatının sədri
15 İyun – Milli Qurtuluş Günü Azərbaycan tarixinin ən əlamətdar və taleyüklü səhifələrindən biridir. Bu gün müasir Azərbaycanın dövlətçilik tarixində yeni inkişaf mərhələsinin başlanğıcı, müstəqilliyin qorunub möhkəmləndirilməsi və güclü dövlət quruculuğunun təməl daşı kimi qiymətləndirilir. Məhz 1993-cü il iyunun 15-də Ümummilli Lider Heydər Əliyevin xalqın təkidli tələbi ilə yenidən siyasi hakimiyyətə qayıdışı ölkəmizi parçalanmaq, müstəqilliyini itirmək və vətəndaş qarşıdurmasına sürüklənmək təhlükəsindən xilas etdi.
1990-cı illərin əvvəllərində müstəqilliyini yenicə bərpa etmiş Azərbaycan ağır ictimai-siyasi və iqtisadi böhranla üz-üzə qalmışdı. Ermənistanın hərbi təcavüzü nəticəsində torpaqlarımız işğal olunur, ölkə daxilində isə anarxiya, xaos və siyasi qeyri-sabitlik hökm sürürdü. Dövlət idarəçiliyində səriştəsizlik, hakimiyyət uğrunda mübarizə və müxtəlif silahlı qrupların fəaliyyəti ölkəni uçuruma aparırdı. 1993-cü ilin iyun hadisələri bu böhranın ən pik nöqtəsinə çevrilmişdi.
Belə bir mürəkkəb və təhlükəli şəraitdə Azərbaycanı xilas edə biləcək yeganə siyasi lider zəngin dövlətçilik təcrübəsinə malik Heydər Əliyev idi. Xalqın çağırışına cavab verən Ümummilli Lider Naxçıvandan Bakıya gələrək 15 iyun 1993-cü ildə Azərbaycan Ali Sovetinin sədri seçildi. Bununla da ölkənin taleyində yeni mərhələ başlandı.
Heydər Əliyevin qətiyyətli və uzaqgörən siyasəti nəticəsində ölkədə sabitlik bərpa olundu, dövlət institutları möhkəmləndirildi, vətəndaş qarşıdurmasının və parçalanma təhlükəsinin qarşısı alındı. Azərbaycanın dövlət müstəqilliyinin dönməzliyi təmin edildi və xalqın gələcəyə inamı yenidən bərpa olundu. Məhz bu tarixi xidmətlərə görə 15 İyun Azərbaycan xalqının yaddaşına Milli Qurtuluş Günü kimi həkk olunub.
1997-ci ildə Milli Məclisin qərarı ilə 15 İyun rəsmən Milli Qurtuluş Günü elan edildi. Bu qərar Azərbaycan dövlətçiliyinin xilası və inkişafında Heydər Əliyevin misilsiz xidmətlərinə verilən yüksək qiymətin ifadəsi idi.
Ümummilli Liderin rəhbərliyi ilə həyata keçirilən uğurlu siyasət ölkəmizin hərtərəfli inkişafına geniş imkanlar yaratdı. 1994-cü ilin sentyabrında imzalanan “Əsrin müqaviləsi” Azərbaycanın iqtisadi inkişafında yeni dövrün əsasını qoydu. Bu mühüm sənəd ölkənin enerji strategiyasının təməlini təşkil etməklə yanaşı, Azərbaycanın beynəlxalq nüfuzunun artmasına və xarici investisiyaların cəlb olunmasına şərait yaratdı.
Heydər Əliyevin təşəbbüsü və rəhbərliyi ilə Bakı–Tbilisi–Ceyhan neft kəməri, Bakı–Tbilisi–Ərzurum qaz kəməri və Böyük İpək Yolunun bərpası kimi qlobal layihələr həyata keçirildi. Nəticədə Azərbaycan regionun aparıcı dövlətlərindən birinə çevrildi, iqtisadiyyatın bütün sahələrində tərəqqi və inkişaf təmin olundu.
Bu gün Ümummilli Lider Heydər Əliyevin müəyyən etdiyi inkişaf strategiyası Prezident İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan siyasi, iqtisadi və hərbi baxımdan daha da güclənərək beynəlxalq aləmdə nüfuzlu dövlətə çevrilib.
2020-ci ildə Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 günlük Vətən müharibəsində tarixi Zəfər qazandı, torpaqlarımız işğaldan azad edildi. 2023-cü ilin 19–20 sentyabr tarixlərində həyata keçirilən lokal xarakterli antiterror tədbirləri nəticəsində isə ölkəmizin bütün ərazisində dövlət suverenliyi və konstitusiya quruluşu tam təmin olundu.
Bu möhtəşəm nailiyyətlər Azərbaycan xalqının birliyinin, həmrəyliyinin və güclü liderlik amilinin nəticəsidir. Beləliklə, vaxtilə Heydər Əliyevin xilaskarlıq missiyası sayəsində xaos və anarxiyadan qurtulan Azərbaycan bu gün Prezident İlham Əliyevin rəhbərliyi altında sürətlə inkişaf edən, modernləşən, güclü, qalib və suveren dövlət kimi yeni uğurlara imza atır.