Xəbərlər
Tərəqqinin yeni salnaməsi
Sevda Quluyeva
YAP Kəngərli rayon təşkilatının sədri
Azərbaycan Respublikasının Prezidenti İlham Əliyevin avqustun 11-də Naxçıvan Muxtar Respublikasına səfəri muxtar respublikanın həyatında mühüm siyasi, iqtisadi və strateji əhəmiyyət daşıyan hadisələrlə yadda qaldı. Dövlət başçısının səfər çərçivəsində həyata keçirilən tədbirlər zamanı verdiyi mesajlar və Azərbaycan Televiziyasına müsahibəsində səsləndirdiyi fikirlər Naxçıvanın qarşıdakı illərdə hərtərəfli inkişafı üçün genişmiqyaslı proqramın formalaşdığını göstərir. Bu, Prezident İlham Əliyevin Prezident kimi Naxçıvana 17-ci səfəri idi. Dövlət başçısının özünün də qeyd etdiyi kimi, hər bir səfər konkret nəticələrlə müşayiət olunub və bu səfər də Naxçıvanın inkişafında yeni mərhələnin başlanğıcı kimi qiymətləndirilə bilər.
Prezident İlham Əliyev Azərbaycan Televiziyasına müsahibəsində Naxçıvanın bundan sonra da sürətli sosial-iqtisadi inkişafının təmin ediləcəyini xüsusi vurğulayıb. Dövlət başçısının sözlərinə görə, ötən illər ərzində Naxçıvanın ümumi inkişafı istiqamətində mühüm layihələr həyata keçirilib, qarşıdakı dövrdə isə bu işlər daha geniş miqyasda davam etdiriləcək. Bu yanaşma Naxçıvanın yalnız mövcud problemlərinin həllinə deyil, onun gələcək inkişaf modelinin formalaşdırılmasına hesablanıb. Sosial infrastrukturun yenilənməsi, yol təsərrüfatının inkişaf etdirilməsi, yeni iş yerlərinin yaradılması, müasir sənaye müəssisələrinin qurulması və enerji potensialının artırılması bu strategiyanın əsas istiqamətlərini təşkil edir.
Naxçıvanın inkişafında iqtisadi və sosial məsələlərlə yanaşı, təhlükəsizlik amili xüsusi əhəmiyyət daşıyır. Prezident İlham Əliyev müsahibəsində Naxçıvanın müdafiə potensialının gücləndirilməsinin daim prioritet məsələlərdən biri olduğunu bildirib. Dövlət başçısı qeyd edib ki, Naxçıvanın coğrafi xüsusiyyətləri və Azərbaycanın əsas hissəsi ilə birbaşa quru bağlantısının olmaması burada təhlükəsizlik məsələlərinə xüsusi diqqət yetirilməsini zəruri edir. Bu istiqamətdə son illərdə mühüm işlər görülüb. Əlahiddə Ümumqoşun Ordusunun yaradılması, müasir hərbi texnika ilə təchizat və yeni komando qüvvələrinin formalaşdırılması Naxçıvanın müdafiə qabiliyyətinin daha da möhkəmləndirilməsinə xidmət edir.
Prezident İlham Əliyevin müsahibədə vurğuladığı kimi, Azərbaycan Silahlı Qüvvələri bölgədə söz sahibidir. Naxçıvanın hərbi potensialının bundan sonra da gücləndiriləcəyi barədə dövlət başçısının mesajı regionun təhlükəsizliyinin Azərbaycanın dövlət siyasətində xüsusi yer tutduğunu bir daha göstərir. Səfərin mühüm hadisələrindən biri Naxçıvan Sənaye Parkının təməlinin qoyulması oldu.
Sənaye Parkının yaradılması Naxçıvanın iqtisadi potensialının daha səmərəli reallaşdırılması, qeyri-neft sektorunun inkişafı, yeni istehsal sahələrinin yaradılması və məşğulluğun artırılması baxımından mühüm əhəmiyyət daşıyır. Prezident İlham Əliyev müsahibəsində bildirib ki, Naxçıvan Sənaye Parkı ərazi baxımından Azərbaycanda Sumqayıt Sənaye Parkından sonra ikinci böyük sənaye parkı olacaq. Dövlət başçısı Parkda praktiki işlərin tezliklə başlanacağına əminliyini ifadə edib. Bu layihə Naxçıvanın iqtisadiyyatında yeni sənaye mərhələsinin əsasını qoymaqla yanaşı, yerli sahibkarlığın inkişafına, investisiyaların cəlb edilməsinə və yeni iş yerlərinin yaradılmasına da mühüm imkanlar açacaq.
Naxçıvanın gələcək inkişaf strategiyasında enerji təhlükəsizliyi mühüm yer tutur. Prezident İlham Əliyev müsahibəsində muxtar respublikanın enerji potensialının geniş olduğunu və artıq Naxçıvanın enerji idxal edən deyil, gələcəkdə enerji ixrac edən əraziyə çevrilməsinin qarşıda duran əsas məqsədlərdən biri olduğunu bildirib. Naxçıvanda günəş enerjisinin potensialının xüsusilə böyük olması bu baxımdan mühüm üstünlükdür. Səfər zamanı 50 meqavat gücündə iki Günəş Elektrik Stansiyasının tikintisi ilə tanışlıq da yaşıl enerji sahəsində görülən işlərin miqyasını göstərir.
Bununla yanaşı, Naxçıvan Sənaye Parkının tərkibində 300 meqavat gücündə istilik elektrik stansiyasının inşası nəzərdə tutulur. Prezidentin sözlərinə görə, bu stansiya Naxçıvanın mövcud generasiya gücünü əhəmiyyətli dərəcədə artıracaq və həm daxili enerji tələbatının dayanıqlı təminatına, həm də ixrac imkanlarının genişləndirilməsinə xidmət edəcək. Beləliklə, Naxçıvanın enerji siyasəti yalnız enerji təhlükəsizliyinin təmin edilməsi ilə məhdudlaşmır. Qarşıya qoyulan məqsəd Naxçıvanı elektrik enerjisi istehsal edən, qəbul edən, ötürən və ixrac edən mühüm enerji məkanına çevirməkdir. Prezident İlham Əliyevin müsahibəsində səsləndirdiyi fikirlər bu strateji hədəfin mahiyyətini aydın şəkildə ortaya qoyur.
Naxçıvanın Azərbaycan tarixində xüsusi yerini müəyyənləşdirən əsas amillərdən biri də bu qədim diyarın Azərbaycan xalqına Ümummilli Lider Heydər Əliyev kimi böyük şəxsiyyət bəxş etməsidir. Heydər Əliyevin Naxçıvanda yaşadığı və siyasi fəaliyyət göstərdiyi illər Azərbaycan dövlətçilik tarixinin mühüm mərhələlərindən biri kimi yadda qalıb. Məhz Naxçıvanda Ulu Öndərin rəhbərliyi ilə Azərbaycanın dövlət müstəqilliyinin və milli dövlətçilik ənənələrinin möhkəmləndirilməsi istiqamətində mühüm addımlar atılıb. Bu baxımdan Naxçıvan təkcə Azərbaycanın ayrılmaz hissəsi deyil, həm də müasir Azərbaycan dövlətçiliyinin siyasi-mənəvi dayaqlarından biridir.
Prezident İlham Əliyevin müsahibəsində xüsusi diqqət çəkən məsələlərdən biri də Zəngəzur dəhlizi ilə bağlı səsləndirdiyi fikirlərdir. Dövlət başçısı qeyd edib ki, Zəngəzur dəhlizinin yaradılması Azərbaycanın təşəbbüsüdür və əsas məqsədlərdən biri Azərbaycanın əsas hissəsini Naxçıvanla birləşdirməkdir. Bu baxımdan Zəngəzur dəhlizi yalnız nəqliyyat layihəsi deyil. Azərbaycanın əsas hissəsi ilə Naxçıvan arasında bağlantının təmin edilməsi ölkənin vahid iqtisadi, nəqliyyat və enerji məkanının möhkəmləndirilməsi baxımından mühüm əhəmiyyət daşıyır. Prezident İlham Əliyevin vurğuladığı kimi, dəhlizin konkret layihələrlə təmin edilməsi daha geniş məna daşıyır. Bu yanaşma Azərbaycanın regionda yeni nəqliyyat və logistika imkanlarından maksimum istifadə etmək niyyətini nümayiş etdirir.
Zəngəzur dəhlizinin reallaşması Naxçıvanın regional nəqliyyat qovşağı kimi mövqeyini daha da gücləndirə, Azərbaycanın Şərq-Qərb və Şimal-Cənub nəqliyyat əlaqələrində rolunu artıra bilər. Naxçıvanın enerji gələcəyi ilə bağlı Prezident İlham Əliyevin səsləndirdiyi fikirlər muxtar respublikanın inkişaf perspektivlərinin nə qədər geniş olduğunu göstərir. Bir tərəfdən yeni istilik elektrik stansiyasının yaradılması, digər tərəfdən günəş və su elektrik stansiyalarının potensialından istifadə Naxçıvanın enerji sistemini daha dayanıqlı və çevik edəcək. Dövlət başçısının müsahibədə qeyd etdiyi kimi, artıq əsas məsələ Naxçıvanın enerji ilə təmin edilməsi deyil, gələcəkdə istehsal etdiyi enerjinin ixracına nail olmaqdır. Bu, Naxçıvanın iqtisadi inkişafında yeni keyfiyyət mərhələsi deməkdir. Günəş enerjisinin geniş imkanları, su ehtiyatları və yeni generasiya güclərinin yaradılması Naxçıvanı Azərbaycanın yaşıl enerji strategiyasında mühüm mərkəzlərdən birinə çevirə bilər.
Naxçıvanın iqtisadi inkişafının əsas istiqamətlərindən biri də müasir sənaye komplekslərinin yaradılması olacaq. Naxçıvan Sənaye Parkının fəaliyyəti ilə paralel olaraq müxtəlif istehsal sahələrinin yaradılması, yeni iş yerlərinin açılması və yerli iqtisadi potensialın dövriyyəyə cəlb olunması nəzərdə tutulur. Bu proses Naxçıvanın iqtisadi strukturunun daha da şaxələndirilməsinə imkan verəcək. Sənayenin inkişafı kənd təsərrüfatı, logistika, xidmət, tikinti və digər sahələrin də inkişafına əlavə stimul yaradacaq.
Prezident İlham Əliyevin müsahibəsində səsləndirdiyi fikirlərdən görünür ki, dövlətin əsas məqsədlərindən biri Naxçıvanda insanların rahat, təhlükəsiz və firavan yaşaması üçün bütün zəruri şəraitin yaradılmasıdır. Bunun üçün iqtisadi inkişafla yanaşı, sosial infrastrukturun yenilənməsi, uşaq bağçalarının tikintisi və təmiri, yol infrastrukturunun yaxşılaşdırılması kimi layihələr də həyata keçiriləcək.
Prezident İlham Əliyevin 11 avqust tarixində Naxçıvanda Azərbaycan Televiziyasına verdiyi müsahibə göstərir ki, muxtar respublikanın qarşısında yeni və daha böyük inkişaf hədəfləri dayanır. Naxçıvanın müdafiə potensialının gücləndirilməsi, sənayeləşmə prosesinin sürətləndirilməsi, enerji təhlükəsizliyinin daha da möhkəmləndirilməsi, bərpaolunan enerji mənbələrindən geniş istifadə, nəqliyyat-kommunikasiya imkanlarının artırılması, Zəngəzur dəhlizinin reallaşdırılması və sosial infrastrukturun yenilənməsi vahid inkişaf strategiyasının tərkib hissələridir. Bu mənada Prezident İlham Əliyevin səfər çərçivəsində verdiyi mesajları yalnız bu günün vəzifələri kimi deyil, Naxçıvanın gələcək onilliklər üçün inkişaf konsepsiyasının əsas istiqamətləri kimi qiymətləndirmək olar.
Dövlət başçısının öz ifadəsi ilə desək, “planlar böyükdür”. Bu planların reallaşdırılması üçün siyasi iradənin, maliyyə imkanlarının və dövlət resurslarının mövcudluğu Naxçıvanın qarşıdakı dövrdə daha sürətli inkişaf edəcəyinə əsas verir. 11 avqust səfəri və Prezident İlham Əliyevin müsahibəsi bir daha nümayiş etdirdi ki, Naxçıvan Azərbaycanın ümumi inkişaf strategiyasında xüsusi və mühüm yer tutur. Qarşıdakı dövr qədim diyarın təhlükəsiz, müasir, sənayeləşmiş, enerji potensialından səmərəli istifadə edən və regional əlaqələrdə mühüm mövqeyə malik bir mərkəzə çevrilməsi baxımından yeni imkanlar yaradır.