Xəbərlər
Yeni imkanlar və inkişaf xətti

Natiq Quluzadə
YAP Zəngilan rayon təşkilatının sədri
Azərbaycan ilə Vyetnam əməkdaşlıq əlaqələrini strateji münasibətlər səviyyəsinə çıxarmağı hədəfləyib. Bu baxımdan Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın mayın 7-də Azərbaycana səfəri xüsusi əhəmiyyət kəsb edir. Səfər çərçivəsində bir çox mühüm sənədlər imzalanıb. Azərbaycan ilə Vyetnam arasında qəbul edilmiş Strateji Tərəfdaşlıq haqqında Birgə Bəyanat Vyetnam-Azərbaycan əlaqələrini daha yüksək pilləyə qaldıran bir sənəddir. Bu sənədin əhəmiyyətini xüsusi vurğulayan Prezident İlham Əliyev mətbuata bəyanatla etdiyi çıxışında bildirib ki, yüksəksəviyyəli münasibətlər gələcək ikitərəfli əməkdaşlıq üçün də ən vacib rol oynayacaqdır. Bundan başqa, imzalanmış sənədlər arasında bir çox istiqamətlər üzrə anlaşma memorandumları da vardır.
Birgə səylər nəticəsində ticarət, iqtisadiyyat, mədəniyyət, təhsil, energetika, nəqliyyat və digər istiqamətlər üzrə çox ciddi əməkdaşlıq potensialı yaradılıb. Həmçinin, energetika sahəsində imzalanmış sənədlər və apardığımız müzakirələr deməyə əsas verir ki, yaxın gələcəkdə bu sahədə əməkdaşlıq daha da genişləndiriləcək. Bu gün əməkdaşlıq daha çox ticarət formasında aparılır. Ancaq qarşılıqlı sərmayə qoyuluşu məsələləri də müzakirə edildi. Həm Vyetnam şirkətlərinin Azərbaycana, həm də Azərbaycanın neft şirkətinin Vyetnama sərmayə qoyuluşu məsələləri müzakirə olundu və hər iki ölkənin rəhbərləri tərəfindən göstəriş verildi ki, aidiyyəti qurumlar bu məsələlərlə bağlı konkret addımlar atsınlar.
Dövlət başçılarının keçirdikləri görüşlər çərçivəsində bərpaolunan enerji növlərinin istehsalı ilə bağlı da fikir mübadiləsi aparılıb. Qeyd olunub ki, Azərbaycanın bu sahədə çox böyük imkanları, potensialı var. İmzalanmış sənədlər 5 il bundan sonra ölkəmizə 6500 meqavat gücündə bərpaolunan enerji qazandıracaq. Vyetnam şirkətləri də bu layihələrə investisiya qoymağa dəvət edildilər. Eyni zamanda, Azərbaycan tərəfinin Vyetnamda bərpaolunan enerji növlərinə sərmayə qoymağa hazır olduğu diqqətə çatdırılıb.
Vacib məqamlardan biri budur ki, ölkələrimizin beynəlxalq təşkilatlardakı birgə fəaliyyəti də çox ürəkaçandır. Vyetnam bir neçə il bundan əvvəl Azərbaycanı BMT Təhlükəsizlik Şurasında çox ciddi dəstəkləmişdir. Eyni zamanda, ölkələrimiz Qoşulmama Hərəkatı çərçivəsində birgə fəaliyyət göstərirlər və bu təşkilatın daha da sanballı təsisat kimi fəaliyyəti hər iki ölkənin marağındadır. Azərbaycan və Vyetnam arasında beynəlxalq hüququn aliliyi xüsusunda da heç bir fikir ayrılığı yoxdur. Bütün məsələlər ölkələrin ərazi bütövlüyü, suverenliyi, sərhədlərin toxunulmazlığı əsasında - beynəlxalq hüquq çərçivəsində öz həllini tapmalıdır. Bütün mübahisəli məsələlər danışıqlar yolu ilə, sülh yolu ilə həll olunmalıdır. Bütün bu məsələlərdə Azərbaycan və Vyetnam vahid mövqedən çıxış edir. Bu isə ölkələrimiz arasında əməkdaşlıq əlaqələrinin genişləndirilməsi baxımından mühüm amildir.