Xəbərlər
Azərbaycan mühüm aktora çevrilib
Şəhla Abdullayeva
YAP Ucar rayon təşkilatının sədri
Azərbaycan-Amerika münasibətləri son zamanlar dinamik şəkildə inkişaf edir. Bu inkişafın əsas səbəblərindən biri odur ki, artıq Amerika siyasətində Azərbaycana münasibətdə real dəyişikliklər hiss olunur. Görünən odur ki, Tramp administrasiyası əvvəlki dövrlərdən fərqli olaraq Azərbaycanla daha praqmatik və uzaqgörən bir siyasət aparmaq niyyətini atdığı addımları ilə təsdiqləyir. İki ölkə arasında münasibətlər strateji maraqlara əsaslanır.
Azərbaycan artıq təkcə regional yox, daha geniş coğrafi məkanlarda mühüm rol oynayan bir aktora çevrilib. Belə ki, son illərdə ölkəmiz Mərkəzi Asiya siyasətinə aktiv şəkildə inteqrasiya olunub. Eyni zamanda, Azərbaycan Yaxın Şərqdə də öz mövqeyini gücləndirir. Fəallığımız təkcə siyasi sahədə deyil, iqtisadi və nəqliyyat-logistika xəritəsində də açıq-aydın hiss olunur. Bu, Azərbaycanın regional yox, artıq qlobal proseslərdə də təsir imkanına sahib olduğunu göstərir.
ABŞ Azərbaycanla əməkdaşlığı prioritet məsələ kimi öndə saxlayır. Çünki Azərbaycan olmadan bu regionda uzunmüddətli sabitlik və əməkdaşlıq platforması qurmaq mümkün deyil. Cənab İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində bildirdi ki, avqustun 8-də Vaşinqtonda baş verən hadisələr, əslində, qarşıdurmanın və gərginliyin sonu deməkdir. Azərbaycan və Ermənistanın Ağ Evdə Prezident Trampın iştirakı ilə bu sənədi paraflaması müharibənin başa çatdığını göstərir. Bu, mərhələlərlə 30 ildən artıq davam edən müharibənin sonudur və həm Cənubi Qafqaz regionu, həm də daha geniş mənada Mərkəzi Asiya və Yaxın Şərq üçün tamamilə yeni imkanlar açır.
Ölkə Prezidenti həmçinin diqqəti Azərbaycan-ABŞ münasibətlərinə, Donald Trampın Nobel Sülh Mükafatına namizədliyinin irəli sürülməsinə yönəldərək onu da bildirdi ki, bəli, düzdür, erməni həmkarımla birlikdə Prezident Trampın Nobel Sülh Mükafatına namizədliyini irəli sürdük. O, həqiqətən buna layiqdir. O, bir neçə ay ərzində Afrikada, Asiyada, Cənubi Qafqazda möcüzə yaradıb. Bu, onun xarakteridir, bu, onun təbiətidir. O, sülh istəyir. O, Qərb liderlərinin ənənəvi imicindən tamamilə fərqli bir şəxsiyyətdir. O, çox mehribandır, tərifəlayiq insandır. Bu, onunla ilk görüşüm idi, ancaq siyasətçi kimi ona münasibətim həmişə müsbət olub: “Hətta onun ilk prezidentlik dövründə belə, - ancaq o vaxt görüşmək imkanımız olmayıb, xüsusilə də o, “dərin dövlət”in nümayəndələri tərəfindən seçki saxtakarlığı ilə seçilməkdən məhrum edilib, - onun qələbəsini əlindən aldılar. Onun poçtla göndərilən səs bülletenləri ilə bağlı fikirləri tamamilə düzgündür. Çünki Amerika administrasiyaları həmişə bütün dünyaya necə yaşamalı, demokratiyanı necə qurmalı, seçkiləri necə təşkil etməli olduğumuz barədə mühazirə oxumağı xoşlayır. Lakin onlar özləri Prezident Trampı qələbədən məhrum edərək, ona qarşı ən böyük seçki saxtakarlığını etdilər. O, prezident olmadığı müddətdə özünü çox layiqli şəkildə aparıb. O, böyük cəsarət və ləyaqət nümayiş etdirərək Amerikada yenidən hakimiyyətə qayıtdı. Qurbağalarla dolu bütün bu bataqlıqlar - USAID, “Radio Liberty”, “Washington Post”, “New York Times”, “Wall Street Journal”, “Newsweek” kimi saxta xəbər mənbələrinin hamısı onun əleyhinə idi”.
Dövlət başçısı İlham Əliyev Bayden administrasiyası dövrünün reallıqlarından da danışaraq vurğuladı ki, o, “907-ci düzəliş”i yenidən tətbiq etməyə başladı. “907-ci düzəliş” 2001-ci ildə dayandırıldı. Niyə? Çünki onların Əfqanıstanda bizə ehtiyacları var idi. Onlara səmamız, dənizimiz lazım idi. Onlara dəmir yolu lazım idi. Biz Amerika logistikasına və daşımalara çox mühüm dəstək verdik. Beləliklə, Bayden Əfqanıstandan qaçan kimi bizə yenidən sanksiya tətbiq etdilər. Axı, necə belə nankor olmaq olar?! Beləliklə, onların haqqında nə düşünə bilərdik? Biz onlarla bütün əlaqələri kəsdik. Bayden administrasiyası ilə əlaqələr sıfra enmişdi. Bu, bir fəlakət idi. Tramp isə tamamilə fərqlidir. Cənab İlham Əliyev belə bir əminliyi ifadə etdi ki, o, nəinki Amerikanı yenidən qüdrətli edəcək bir insandır, o, Amerikanın rifah, azadlıq və inkişafın rəmzi olduğu bütün dövrlərdəki kimi, ölkəni yenidən insanların heyran olduğu yerə çevirəcək. Altı ay ərzində bu qədər məkana sülh gətirməyi bacarırsa, əminəm ki, bunu edəcək: “Amma sistemin ona qarşı güclü müqaviməti var. Həm də vurğulamaq istədiyim bir şey də var ki, xüsusilə də mənə təsir edən sui-qəsd cəhdi zamanı onun özünü necə aparması idi. Bunu oynamaq mümkün deyil. Heç bir nitq yazan, heç bir siyasi məsləhətçi bunu edə bilməz ki, adam belə reaksiya versin. O, cəsur insan və böyük liderdir. Mən həqiqətən də fəxr edirəm ki, o, mənə dostu kimi yanaşır”.
Azərbaycanın ədalətə və beynəlxalq hüquqa söykənən siyasətinə dəstək bu gün xarici siyasət uğurlarının coğrafiyasının genişlənməsində özünün aydın ifadəsini tapır. Azərbaycan bütün dövlətlərlə bərabərhüquqlu, qarşılıqlı hörmət və maraqlar prinsipi əsasında əlaqələrini yeni istiqamətlər üzrə inkişaf etdirir.