Xəbərlər
YAP Astara rayon təşkilatının XII konfransı keçirilib
Sentyabrın 18-də Yeni Azərbaycan Partiyası (YAP) Astara rayon təşkilatının XII konfransı keçirilib.
Əvvəlcə xalqımızın Ümummilli Lideri Heydər Əliyevin abidəsi ziyarət edilib, önünə gül dəstələri düzülüb.
Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.
YAP Astara rayon təşkilatının sədri Həbib Cəfərov hesabat məruzəsi ilə çıxış edib. O bildirib ki, hesabat dövründə rayon təşkilatı qarşıya qoyulan vəzifələrin yerinə yetirilməsi istiqamətində ardıcıl və sistemli iş aparıb. Partiya üzvlərinin ictimai-siyasi fəallığının artırılması, ideoloji işin gücləndirilməsinin diqqət mərkəzində saxlanıldığı qeyd olunub.
Astara Rayon İcra Hakimiyyətinin başçısı Qəzənfər Ağayev vurğulayıb ki, Prezident, Yeni Azərbaycan Partiyası Sədri İlham Əliyevin rəhbərliyi ilə həyata keçirilən məqsədyönlü siyasət ölkənin davamlı inkişafına töhfə verir. O, Astara rayonunda həyata keçirilən abadlıq-quruculuq və sosial-iqtisadi layihələrdən geniş bəhs edib.
YAP İdarə Heyətinin üzvü, Milli Məclisin deputatı Rəşad Mahmudov qeyd edib ki, partiyanın milli maraqlara əsaslanan siyasi mövqeyi ölkənin davamlı inkişafına və dövlətçilik ənənələrinin möhkəmləndirilməsinə xidmət edir. O, YAP Astara rayon təşkilatının hesabat dövründə fəallığı ilə seçildiyini, qarşıya qoyulan vəzifələrin icrasında partiya üzvlərinin birgə fəaliyyətinin mühüm rol oynadığını deyib.
Astara Pedaqoji Kolleci ərazi partiya təşkilatının sədri, şəhid atası Kamran Kazımov, Astara Təhsil sektoru ərazi partiya təşkilatının sədri Xədicə Əliyeva, Astara Rayon Ağsaqqallar Şurasının sədri Natiq İbadov partiyanın keçdiyi şərəfli yoldan və hesabat dövründə rayon təşkilatının fəaliyyətindən danışıblar.
YAP Mərkəzi Aparatının Təşkilat şöbəsinin baş məsləhətçisi Əli Axundov partiyanın VII qurultayından sonra müəyyənləşdirilən prioritet vəzifələrə toxunub. Qeyd olunub ki, YAP Astara rayon təşkilatı hesabat dövründə fəaliyyətini qarşıya qoyulmuş vəzifələrə uyğun quraraq məqsədyönlü fəaliyyət göstərib.
Konfransda YAP Astara rayon təşkilatının hesabat dövründəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.
Sonda Yeni Azərbaycan Partiyasının Himni səsləndirilib.
