Xəbərlər
Regionda sabitliyin, təhlükəsizliyin və davamlı inkişafın təminatçısı
Zahir Qəhrəmanov
YAP Şirvan şəhər təşkilatının sədri
İqtisadi Əməkdaşlıq Təşkilatı (ECO) region dövlətləri arasında iqtisadi tərəfdaşlığı, ticarət əlaqələrini və dayanıqlı inkişafı təşviq edən mühüm beynəlxalq qurumlardan biridir. Bu təşkilat üzv dövlətlərin iqtisadi maraqlarının birləşdirilməsi, ortaq layihələrin həyata keçirilməsi və regional inteqrasiyanın gücləndirilməsi məqsədilə fəaliyyət göstərir. ECO-nun hər bir Zirvə Görüşü regionun gələcək inkişaf istiqamətlərini müəyyən etmək, yeni əməkdaşlıq mexanizmlərini formalaşdırmaq və mövcud problemlərə birgə həll yolları tapmaq baxımından xüsusi əhəmiyyət daşıyır. Təşkilat iqtisadi əməkdaşlıqla yanaşı, enerji, nəqliyyat, turizm, ətraf mühit və digər sahələrdə də birgə layihələrin həyata keçirilməsinə önəm verir. ECO regionu coğrafi mövqeyinə, təbii resurslarına və nəqliyyat imkanlarına görə beynəlxalq aləmdə mühüm strateji məkan kimi tanınır.
2025-ci ildə ilk dəfə olaraq ECO-nun 17-ci Zirvə Görüşünün məhz Xankəndi şəhərində keçirilməsi təkcə Azərbaycanın deyil, bütün regionun tarixində mühüm hadisə kimi qiymətləndirilməlidir. Bu Zirvə Görüşü təkcə iqtisadi əməkdaşlıq baxımından deyil, həm də siyasi və mənəvi baxımdan böyük əhəmiyyətə malik oldu. Xankəndi şəhərində belə mötəbər tədbirin keçirilməsi Azərbaycanın ərazi bütövlüyünün bərpasının və suverenliyinin beynəlxalq miqyasda tam təsdiqinin bariz nümunəsi idi. Zirvə görüşündə iştirak edən dövlət başçıları və nümayəndə heyətləri Azərbaycanın regionda sülh və əməkdaşlıq təşəbbüslərini dəstəklədiklərini bir daha nümayiş etdirdilər. Xankəndidə keçirilən bu tədbir regionda yeni əməkdaşlıq səhifəsinin açıldığını simvolizə etdi və bütün ECO ölkələri üçün həm iqtisadi, həm də siyasi baxımdan müsbət mesajlar verdi.
Zirvə Görüşündə Prezident İlham Əliyevin çıxışı xüsusilə diqqət çəkdi. Dövlət başçısı Azərbaycanın ECO çərçivəsində gördüyü işlərdən, reallaşdırdığı mühüm nəqliyyat və enerji layihələrindən, həmçinin regionda sabitlik və inkişaf üçün irəli sürdüyü təşəbbüslərdən bəhs etdi. Prezident İlham Əliyev qeyd etdi ki, Xankəndinin bu mühüm tədbirə ev sahibliyi etməsi Azərbaycanın regionda sülhü və təhlükəsizliyi təmin etmək istiqamətində atdığı addımların məntiqi nəticəsidir. O, çıxışında Zəngəzur dəhlizi, Orta Dəhliz və Bakı-Tbilisi-Qars dəmir yolu kimi layihələrin əhəmiyyətini vurğuladı və bunların regionun tranzit imkanlarını artırmaqla yanaşı, ECO ölkələri arasında əməkdaşlığı gücləndirdiyini bildirdi. Prezident, həmçinin, rəqəmsal iqtisadiyyatın inkişafı, alternativ enerji mənbələrinin istifadəsi və ekoloji təhlükəsizlik məsələlərinin də ECO çərçivəsində əsas prioritetlərdən biri olduğunu xüsusi qeyd etdi. Onun çıxışı bütün iştirakçı dövlətlər tərəfindən maraq və yüksək qiymətləndirilmə ilə qarşılandı.
Xankəndidə keçirilən Zirvə Görüşünün yekununda qəbul edilən sənədlər və razılaşmalar ECO-nun gələcək inkişaf istiqamətləri baxımından böyük əhəmiyyət kəsb edir. Regional ticarət əlaqələrinin genişləndirilməsi, gömrük prosedurlarının sadələşdirilməsi, birgə sərmayə layihələrinin təşviqi və nəqliyyat dəhlizlərinin effektivliyinin artırılması prioritet istiqamətlər kimi müəyyən olundu. Xankəndi Zirvə Görüşü həm də region dövlətləri arasında siyasi dialoqun və qarşılıqlı etimadın möhkəmləndirilməsi baxımından yeni mərhələnin əsasını qoydu. Azərbaycanın bu prosesdə oynadığı aparıcı rol, təqdim etdiyi yeni təşəbbüslər və əməkdaşlığa verdiyi töhfə təşkilatın gələcək uğurlarının əsas dayaqlarından biri olacaq.
Xankəndidə keçirilmiş ECO-nun 17-ci Zirvə Görüşü təkcə region üçün deyil, bütün beynəlxalq ictimaiyyət üçün mühüm mesaj oldu. Bu Zirvə görüşü bir daha göstərdi ki, Azərbaycan regionda sabitliyin, təhlükəsizliyin və davamlı inkişafın əsas təminatçılarından biridir. Azərbaycanın irəli sürdüyü layihələr və təşəbbüslər təkcə milli maraqlara xidmət etmir, eyni zamanda bütün ECO regionunun rifahına və inkişafına xidmət edir. Xankəndinin bu mötəbər tədbirə ev sahibliyi etməsi tarixə düşəcək bir hadisə olmaqla yanaşı, regionda yeni əməkdaşlıq imkanlarının qapısını açdı. İnanıram ki, gələcəkdə ECO çərçivəsində əməkdaşlıq daha da dərinləşəcək və Xankəndi Zirvə Görüşü bunun üçün yeni bir başlanğıc nöqtəsi olacaq.