Xəbərlər
Tarixi ədalət, suverenlik və milli birliyin təntənəsi
Prezident İlham Əliyevin Xocalı və Xocavənd rayonlarına səfəri, burada görülən işlərlə tanışlıq, öz yurd-yuvalarına qayıdan sakinlərlə səmimi söhbətləri xalqımızın yaddaşına tarixi anlar kimi həkk olunub. Uzun on illiklər ərazilərin Ermənistanın işğalında olması və nəhayət 2020-ci ilin 44 günlük Vətən müharibəsi və 2023-cü ilin sentyabrındakı bir günlük antiterror tədbirləri nəticəsində ölkəmizin ərazi bütövlüyü və suverenliyi tam təmin edilib. Bu gün Azərbaycanın bütün sərhədlərində şanlı bayrağımız qürurla dalğalanır. Xalqımız qalib xalq kimi bundan sonra əbədi olaraq günü-gündən güclənən Azərbaycanın uğurları ilə fərəhlənir.
Bu fikirləri YAP Təftiş Komissiyasının sədri, Milli Məclisin deputatı Sevinc Hüseynova deyib.
O qeyd edib ki, Prezident İlham Əliyevin rəhbərliyi, birbaşa diqqət və qayğısı ilə 30 il Ermənistanın işğalında saxlanılan, viran qoyulan Qarabağ və Şərqi Zəngəzur yenidən qurulur, bərpa edilir: “30 il işğalda saxlanıldığı dövrdə bütün yaşayış məntəqələri, infrastruktur, ərazinin ekoloji durumu belə pozulub. Bu gün isə güclü və qalib Azərbaycan özü təkbaşına ərazilərimizdə “Böyük Qayıdış” konsepsiyasına uyğun olaraq işləri icra edir. Məhz bunun nəticəsidir ki, uzun on illiklər öz ata-baba ocaqlarından didərgin düşmüş sakinlər yurd-yuvalarına, mənsub olduqları torpaqlara qayıdır. Dövlətimiz tərəfindən sözsüz ki, keçmiş qaçqın və məcburi köçkünlərin geri dönüb burada əbədi rahat, xoşbəxt və təhlükəsizlik şəraitində yaşaması üçün bütün zəruri addımlar atılır.
Ölkəmizin başçısı da Xocalı və Xocavəndə səfəri zamanı öz evlərinə qayıdan sakinlərlə səmimi söhbətlərində 90-cı illərin əvvəllərində xalqımızın başına gətirilən müsibətlərdən bəhs etdi. Vurğulandı ki, Azərbaycan xalqı bütün çətinliklərə baxmayaraq öz milli qürurunu qorumağı bacarıb və nəhayətdə tarixi ədalət təmin edilib”.
Deputat Prezident İlham Əliyevin Xocalı Soyqırımı Memorial Kompleksinin açılış mərasimindəki çıxışının mühüm mesajları özündə ehtiva etdiyini bildirib: “Ölkəmizin başçısı Xocalı Soyqırımı Memorial Kompleksinin açılış nitqinin müasir Azərbaycan dövlətçiliyinin siyasi-fəlsəfi, hüquqi və strateji əsaslarını özündə ehtiva edən mühüm proqram xarakterli yol xəritəsi kimi xarakterizə edilir. Dövlətimizin başçısı Xocalı soyqımının anım günü belə bir Kompleksin açılışının edilməsinin tarixi əhəmiyyətinə toxunub. 1992-ci ilin fevralın 25-dən, 26-a gecə gecə Ermənistan silahlı qüvvələrininin Xocalıda əli yalın, dinc insanlara qarşı tarixdə misli-bərabəri görünməyən soyqırım aktı icra edildiyi bir daha diqqətə çatdırıldı. Sözsüz ki, Xocalı Memorial Kompleksinin açılışı yalnız tarixi hadisənin anılması deyil, eyni zamanda uzun illər davam etmiş işğal dövrünün, aparılmış diplomatik mübarizənin, hərbi-siyasi strategiyanın və postmünaqişə mərhələsində formalaşan yeni reallıqların konseptual şəkildə ümumiləşdirilməsidir.
Cənab Prezidentin də nitqində Xocalı faciəsi milli yaddaşımızın ayrılmaz tərkib hissəsi kimi təqdim olundu, eyni zamanda hadisəyə beynəlxalq hüquq müstəvisində siyasi qiymət verilməsi və ədalətin bərpası prosesi mərhələli şəkildə aparılması izah edildi. Xocalı soyqırımı təkcə Azərbaycan xalqına qarşı törədilmiş cinayət kimi deyil, bütövlükdə insanlığa qarşı yönəlmiş ağır hərbi cinayət kimi səciyyələndirilir. Bu hadisəyə emosional deyil, beynəlxalq hüquqi çərçivədə yanaşmanı əks etdirir.
Çünki 1992-ci ilin fevralın 25-dən 26-a gecə gecə Xocalıda azərbaycanlılara qarşı sistemli zorakılıq və soyqırım aktı həyata keçirilib. Qadınlar və uşaqlar da daxil olmaqla yüzlərlə günahsız insan qətlə yetirilib. Bu mənada Ermənistan dövləti bu hadisələrə görə siyasi və hüquqi məsuliyyət daşıyır. Bu amil Xocalı faciəsinin təkcə tarixi fakt deyil, beynəlxalq hüquq baxımından tanınmalı və qiymətləndirilməli hadisə olduğunu göstərir. Prezidentin çıxışında da 20-yə yaxın ölkənin Xocalı hadisələrini soyqırımı kimi tanıması Azərbaycanın məqsədyönlü diplomatik fəaliyyətinin nəticəsi kimi təqdim edilir”.
Sevinc Hüseynova vurğulayıb ki, bu kontekstdə Heydər Əliyev Fondunun fəaliyyəti və “Xocalıya ədalət!” kampaniyası xüsusi önəm kəsb edir: “Fondun təşəbbüsü ilə həyata keçirilən tədbirlər – beynəlxalq konfranslar, simpoziumlar, nəşrlər və təqdimatlar – Azərbaycan həqiqətlərinin dünya ictimaiyyətinə çatdırılmasında mühüm rol oynayır. Prezident İlham Əliyevin Xocalı Soyqırımı Memorial Kompleksinin açılışında etdiyi çıxış bir daha Xocalı faciəsinə beynəlxalq hüquqi-siyasi qiymətin verilməsinin vacibliyi önə çəkilir. Eyni zamanda bu istiqamətdə Azərbaycan dövlətinin 30 illik strateji xətti ardıcıl və sistemli şəkildə təqdim olunur. 2020-ci ilin Vətən müharibəsi və 2023-cü il sentyabrında həyata keçirilən antiterror tədbirləri tarixi ədalətin mərhələli təminatı kimi mühüm əsaslar formalaşdırıb. Bu mənada sözsüz ki, milli birliyin, güclü dövlətçiliyin və tarixi yaddaşın əhəmiyyəti olduqca önəmlidir. Hazırkı postmünaqişə dövründə təhlükəsizlik və sülh konsepsiyası istiqamətində atılan addımlar fonunda tarixi həqiqətlər üzərində qurulan strategiyanın mahiyyəti bir daha özünü qabarıq şəkildə təzahür etdirir.
Bütün bunların fonunda Prezident İlham əliyevin Xocalı Soyqırımı Memeorial Kompleksinin açılışında səsləndirdiyi mühüm fikirlər müasir Azərbaycan dövlətinin güc və suverenlik konsepsiyasının ifadəsi kimi çıxış edir. Xocalı mövzusu bu kontekstdə yalnız keçmişin faciəsi deyil, həm də milli dirənişin, dövlət iradəsinin və ədalətin bərpasının rəmzi kimi təqdim olunur”.